Hospital Watas momoguno ponginwaguan popoingkawas kolidasan tulun ngawi: Hajiji
TUARAN: Lamin pongusapan watas mositi mogium koinsomokan ponginwaguan om kiasil montok popoingkawas do kosonongon om rontob kolidasan tulun ngawi songkoiyonon montok kotundaan pogun.
Montiri Koporintaan Kinoiyonon om Pomulaminan Sabah Datuk Hajiji Mohd Noor minoboros do tulun ngawi doulu noh id labus kakadaian mositi toririmo onuan kopongunsuban montok popoingkawas do kosonongon kolidasan diolo.
“Abaabayan kolidasan ih poonjuron id labus koiyonon lamin pongusapan iso laang di kapanahak kosiwatan kumaa rayat momoguno do kotorinaan kolidasan ih posodiaon do porinta.
“Abaabayan miagal diti apatut onuon kosiwatan di tulun ngawi posorili sabap kotorinaan ih pataakon aiso kabarai (caj) om mogigion obuli tumilombus kapaganu do karaja tabaal pongubatan miampai au maya kooturan ‘temujanji’.” ka disio.
Noboros disio ahal dilo kuminaa monunurat abar kalapas pinotimpuun do Kem Kolidasan om Pongubatan Mato pinanjur do Lamin Pongusapan Tuaran hiti, koniab.
Hajiji ih nogi Puru Lamin Koundangan Pogun bogian Sulaman, kikalansnan nogi tuh lobi ogumu tabaal pongubatan poiyonon id Hospital Tuaran montok papasanang do rayat songkoiyonon kapaganu do kotorinaan miampai au minog mongoi id lamin pongusapan tagayo miagal Hospital Queen Elizabeth id Kota Kinabalu, kiikira 34km mantad hiti.
“Mimang nosiliu kalansanan toinsanan lamin pongusapan watas tuh tabaal pongubatan poiyonon id lamin pongusapan sompori-pori sabap ilo tantu do koponginsonong kotorinaan kolidasan id watas,” ka disio.
Pogului dilo, Potunud Hospital Tuaran Dr G. Mohan minoboros do ‘optometri’ maan posodiao id lamin pongusapan dilo tumimpuun April diti.
Miampai haro nopo kotorinaan dilo, pongubatan mato kapanahak kosiwatan kumaa susumikul pongubatan montok papanau do pingludaan om kotilombus kumaraja id lamin pongusapan dilo. Bernama