Komulakan Umno om BN Sabah nokosodia noh tumoguang pomilian tagayo pogun
SANDAKAN: Otumbayaan ih Luguan Komulakan Umno Khairy Jamaluddin Abu Bakar do Komulakan Umno om Komulakan Barisan Nasional (BN) Sabah nokosodia noh sokoiro ko pomilian tagayo pogun diti pohoroon lobi osikap.
Tumanud dau Luguan Komulakan Umno Sabah Yamani Hafez Musa nakapanahak noh ruputan kokomoi do koposodiaan diolo om otumbayaan isio do BN obuli kapaganu kuasa di tagayo mantad rayat.
Ka disio kalantaian dilo obuli osigampot miampai haro o pamalanan mantad koporintaan pogun om sokodung koporintaan Longkod di tosonong kopio.
“Otumbayaan oku om kotumboyo rayat id Sabah tumilombus manahak sokodung kumaa BN. Katapi minggisom tokou kumaraja. Nosunudan ku noh ih Yamani mooi mindahu tokou doid suriba om minsomok sinakagon tomulok okon noopo Umno katapi BN doulu noh mantad tinaru Sina om Kadazan Dusun om Murut.
“Mositi minsomok tokou diolo om manahak kopointarangan kokomoi ahal ngawi ih di au nasalasai. Haro ahal kinoiyonon tokou om ahal kabansaan, om goduo-duo ahal diti mositi pointarangon sabap tulun tomulok ngawi baino diti kaanu ogumu ‘akses’ doid kopoilaan om ilo mositi simbaron do porinta.
“Om, kada tokou soroho ahal kabansaan di antakan id bogian pisompuruan do aiso asil kumaa tulun tomulok id Sabah. Mantad dilo, kopoinsomokan tokou haro duo ilo nopo nga mositi papatantu do goduoduo ahal diti kaanu tokou monimbar om patarangon kumaa sinakagon tomulok. Iti nopo nga laang tosonong tokou montok koinsasanai dilo,” ka dau.
Noboros disio ahal dilo ontok pinokianu minongomi kokomoi ahal kaharo doti pomilian tagayo pogun lobi osikap kalapas pinotimpuun do Abaabayan Fit Malaysia Nayatan Pogun Sabah id Padang Bandaran Sandakan, hiti koniab.