14 Feb. tadau kiguno montok pasangan koupusan
14 Februari nopo nga timpu di kirati kopio montok pasangan koupusan id pointongkop pomogunan sabap do ontok tadau diti noh pasaangan ih miupus-upus sompori-pori popoboros do tiwou koupusan id pialatan iso om tiso ih suai.
Nga pangaramitan ontok tadau dilo royohon miampai ralan di misusuai tumanud do kapatantuan kouyuon koulalahon ginawo om koubasanan id pogun sompori-pori.
Suai ko ilo, Tadau Koupusan baino diti nakalaab noh toiko ‘universal’ sabap do tadau tosonong kopio dilo nogi obuli podolinon montok popoboros do koupusan kumaa molohing om nogi paganakan sompori-pori.
Montok May Banawai, 39, Tadau Koupusan nopo nga miagal tadau koubasanan om somoonu kopio royohon.
Isio ih haro songulun tanak minoboros do Tadau Koupusan osonong montok pasangan koupusan om ilo iso mantad ralan montok popoboros do tiwou oupus om koupusan kumaa pasangan somporipori.
“Tadau dilo nopo nga osonong kopio montok popoboros do tiwou ginawo sompori-pori kumaa koupusan katapi, tadau dilo nogi osonong kopio montok popokito do koupusan kumaa paganakan di koupusan kopio,” ka dau.
Namot dilo, Karen Bayangad, 29, minoboros do Tadau Koupusan minog royohon miampai kaanu mamaramai noopo, tumanud do susuian dau ih sosondiri kokomoi tadau dilo.
“Okito ku tadau diti mantad tiyonon tosonong om pangaramitan di pohoroon osonong kopio sabap ilo sabaagi iso ponokotanda tokou mamagatang do pasangan sompori-pori.
“Sundung pia Tadau Koupusan obuli royohon do potitikid tadau katapi ontok 14 Februari tantu tadau di tosonong kopio,” ka dau.
Tumanud dau tadau dilo nogi miagal tadau tosonong di susuai miagal pangaramitan tadau kinosusuon om kinouliton toun sabap tadau miagal dilo poposiliu do sosongulun dilo kopuriman do olumaag kopio miampai pasangan dau.
Sundung pia Tadau Koupusan royohon montok koinsasanai (id pointongkop pomogunan) di kogumuan tulun ngawi, katapi montok tulun ngawi Kosilahon (Timur) ilo kakaal haro rontob.
Poingkuro poh nga, miampai ‘senario’ pomogunan baino diti ih maid-laid doung kawawagu om osikap gumura doid tigulu, pangaramitan dilo royohon miampai pomusarahan di poingukab om ih pasangan miupus noopo ih koilo mamaramit do Tadau Koupusan miampai ralan sosondiri.
Id kolimpupuson dilo, tadau tosonong kopio dilo au kopokito do ‘komitmen’ sompori-pori id timpu tabantalan sabap do potitikid pasangan haro pilion om nogi abaabayan.