Masaon pulis mogium sanganu bot
TAWAU: Masaon do pulis mogium sanganu bot ih notoob id kavaigan Batu Payung ontok pougadan doid Sungai Nyamuk, Indonesia di tadau Koduvo nakatahib.
Huguan Pulis Uvang Tawau, ACP Fadil Marsus minoboos do asil pinoinuan nokoiho do sanganu bot, Ansar Sakka nopo nga layat Indonesia kikotumbazaan baino diti kivaa id bogizan Sungai Nyamuk.
“Nosunudan no boogizan Interpol Bukit Aman montok monuhung mogium Ansar,” ka disido doid Bernama doiti, koiab.
Tumanud Fadil, kopoihaan kokomoi sanganu bot nouga sumusuut pinanaan juragan om manakadai juragan ih goduvoduvo dioho natampasi id kinantakan bot bot notoob dino.
“Munggui ngavi ih natampasi minonoodo pongintutunan om soihaan do Ardiansyah Abbas, 23, om Mansur Umar, 25, sanda-daau ih nogi juragan om manakadai juragan bot dino om asil pinanahanan dioho nokopogovit doid kinokitonan kopoihaan sanganu bot notoob dino,” ka disido.
Id ahal dino, minoboos Fadil do pinongintongan boogizan dau maza Kotinanan Hihikiton om Dermaga om Koupisan Ponginsadaan nokoiho do bot notoob dino au insan pinolijisto id Malaysia.
“Bot notoob kavo fiber ih kivotik obulou om opuak dino nosimbanan no mantad 17 kaki kumaa 21 kaki ninau, miampai hinaab 6 kaki om minomoguno do injin Yamaha 200hp,” ka disido.
Namot dino, ka disido pisokodungan miampai bogian monguasa Indonesia maza Konsulat Republik Indonesia id Tawau pinotihombus montok mogium munggui koimpupuson, Joko Rahman, 35, om nogi monuhung mogium Ansar.
“Munggui touvi no au po nokito om au kaanu papatantu noumohig toi au nga id tadau Kohimo nakatahib, iso kantung kisuang pasport munggui nokito id kavaigan Batu Payung doiti,” ka disido.
Gisom baino, 14 mantad 15 munggui nokito, om mantad ginumu dino apat noumohig om noohu dino minidu pogun.
Namot dino, papanau kalaja mogium om manampasi (SAR) munggui, ih pinouhan do Agensi Popogiotkuasa Maritim Malaysia (APMM) pinotood id jam 6 sosodopon songkosodop.
Tumanud Potunud Maritim Wilayah Sabah om Labuan, Laksamana Pertama Maritim Mohd Zubil Mat Som, koputusan dino tinoodo sumusuut pinonoizukan kumaa juragan (Juma) ih tinaan pulis, minoboos do Joko nakaanu minanampasi tinan doid Sungai Nyamuk.
Nga, papanau kalaja SAR dino papanaon mahik nung koikonon Joko au kaanu papatantu om kakaal pinoluput natagak di boogizan monguasa goduvo-duvo pogun.-Bernama