17 puru Konsol Watas Tambunan minangakat sumpa
TAMBUNAN: Kiginumu 17 mantad 18 puru Konsol Watas Tambunan timpu 2017/2018 minangakat sumpa id toguang Ponorikohon Konsol Watas Thomas Logijin, hiti di kawawagu.
Abaabayan dilo nogi sinaasi di Kumoduo Boyoon Montiri om nogi Montiri Kotundaan Infrastruktur Tan Sri Joseph Pairin Kitingan, Upisor Eksekutif Konsol Watas Jupirin Haji Ruhimin, boyoon ngawi koupisan koporintaan pogun om Pisompuruan.
Iyolo ih minangakat sumpa kaampai noh ih Wilfredoline Jakil, Philip Kitingan, Dr Juanis Yajuni, Donny Bullah, Laiwon Dalus, Vincent Saradon, Cyril P Yansalang, Augustine Badi Kandawah, Stephen Kasu, Edmund @Ritas Joumil, Silverius Bruno, Yong Ngun Thoe, Lawrence Abbie, Yasin @Archard Haji Diasin, Raymond Puyon, Paladius J Dominic om Zainal Rashid. Au nokotindapou id abaabayan dilo nga ih Amelia Ajun.
Ontok minanahak boboroson kiguno id abaabayan dilo, Pairin ih nogi Puru Parlimen Keningau mokianu puru Konsol Watas tuh tumilombus minggisom papanau karaja om tonggungan suai ko manahak kotorinaan di tosonong kopio kumaa tulun ngawi koinsasanai.
Pokionuon nogi disio tuh kabarakasan bogian kakadaian kaamung kararalanon pinamansaian parit om pagawasan toririmo onuan pongintongan poimponu.
“Pokionuon ku nogi o tulun ngawi watas diti tuh manahak do ‘komimen’ om maganu kosiwatan poompus Toun Tumombului Tambunan ih masaon mabmanau ontok timpu diti,” ka dau.
Pairin ih nogi Puru Lamin Koundangan Pogun (ADUN) Tambunan nogi nasantaban ginawo miampai ningkokoton watas diti doulu noh mantad kawo kotundaan om kabarakasan kakadaian dilo.