‘Alumni’ SMESH mokianu porinta poposikap do kapamansaian kawagu sikul au oumolig rikohonon
KOTA KINABALU: ‘Alumni’ Sikul Pintangaan Sains Sabah (SMESH) mokianu tuh koposikap do kapamansaian kawagu sikul dilo id Bukit Padang.
Presiden Kelab Alumni SMESH Datin Fauziah Abu Bakar Titingan minoboros do pamansaian sikul dilo id tapak timpuuni kiguno kopio montok poposoribau do tulun kiguno di kalantoi.
“Ontok timpu gulu poh, sikul diti pinopoiyon do toinsanan susumikul kinangaian tosonong (nakalantoi) mantad pointongkop Sabah, nga baino diti kapamaganuan susumikul kinangaian tosonong montok sumuang Tingkatan Empat au potilombuson sabap do tiyonon di pointantu id asrama Institut Balajaran Mongingia (IPG) Kampus Kent, Tuaran.
“Ontok 2015, sabap ahal koumoligan do linominon SMESH ih posodia haro au oumolig do rikohonon, pinabanar do Komontirian Balajaran o kopowolian doid IPG Kent Tuaran montok naamot timpu.
“Poingkuro poh nga, kounalan do hilo okon koinsanai kaanu gunoon di susumikul ngawi SMESH sabap do ‘konsep’ pikunsian ginuno,” ka dau kumaa monunurat abar ontok romuto id iso pinongintongan doid SMESH di tadau Minggu nakatalib.
Monongkotoluod isio kumaa Komontirian Balajaran sabap kikosianan montok pinopawaliu do susumikul ngawi doid IPG Kent sabaagi laang ngawi koumoligan.
Ka dau ahal ih kopotongob nopo nga sokiro ko susumikul SMESH au kaanu momoguno toiko au osimbayan papaharo do kaparagatan pambalajaran poimponu, om kangai-angaian sikul dilo di pogulu poh sabaagi sikul poposoribau do susumikul kinangaian tosonong akasou doti.
“Asrama sikul timpuuni gulu poh obuli poporumpos ginumu susumikul gisom 700 tulun katapi baino diti pinatantu doid 500 susumikul noopo.
“Kinoilaan do linominon timpuuni SMESH maan uyaso om wonsoyon wagu idsuang timpu limo toun om piipiro timpu kakapan mantad bogian komontirian pinaharo, nga kalapas duo toun kinotolibo, aiso poh nunuunu ningkokoton tosonong kokomoi do ahal dilo,” ka dau.
Minoboros isio do pamansaian kawagu SMESH id tapak timpuuni nopo nga kiguno montok popotilombus do kinangaian tosonong sikul dilo suai ko tiyonon dilo nopo nga kangaam om osonong kopio.
Pinatarang nogi di Fauziah do ogumu molohing mimboros om mokianu tuh iso laang tosikap apatut kopio onuon do porinta montok papatantu do kangai-angaian tosonong sikul dilo kaanu popotilombus.
Ka dau iso ‘memorandum’ nogi maan patahako kumaa toinsanan bogian kikoompitan idsuang timpu tosomok.
Nokotindapou nogi id pinongintongan dilo nga ih Yang Dipertua Koisaan Molohing om Mongingia SMESH Sany Abdillah Ahmad.