Bot katamaran notorob kagu
# Siam mamagapon om limo kru natampasi, injin bot naraag doros Pulau Sulug
KOTA KINABALU: Kiginumu 14 mamagapon natampasi kalapas bot katamaran Fat Cat ih sinakaian dilo nakakandai kinaraagan pogului norulun om oruhai noh notorob id kawaigan Pulau Sulug, hiti, di kosuabon tadau Koiso nakatalib.
Potunud Maritim Watas Kota Kinabalu Laksamana Pertama Maritim Adam Aziz minoboros do siam mamagapon om limo kru bot kiumur 20 gisom 50 toun minamanau mantad Jeti Sutera Harbour Resort kiikira jam 9 kosuabon montok magapon id kawaigan Pulau Sapi.
“Kiikira jam 11 kosuabon kalapas dilo, bot dilo nakakandai kinaraagan injin tagayo id goduo-duo tampat pogului rinulun umbak om nouhung id korikohonon 11 batu nautika barat daya Pulau Sulug.
“Siam mantad mamagapon dilo poingkuro poh nga nakaanu minanampasi lobi pogulu di bot mantad Sutera Harbour Resort ih nokorikot id tampat kinantakan soira pinosunud di kapten bot dilo kiikira jam 3 sosodopon.
“Limo kagu kru bot kaamung songulun tondu au mimang tumongkiad do bot sumusuhut kru bot suai minaganu laang montok monginsonong bot dilo,” ka dau id pitimbungakan abar hiti koniab.
Nokotindapou nogi ih Potunud Sistem Panamangan Maritim (Daat) Sabah (Swasla) Komander Maritim Anoop Kumar Ranjit Rai om Pemangku Upisor Memerintah KM Memmon Leftenan Komander Maritim Mohd Khairul Azhar Ishak.
Minoboros Adam do nokotorimo o bogian dau do pamalahauan kaagaban mantad kapten kapal id jam 4 sosodopon om minonuhu do Bot Kilat 36 suminikap minoi id tampat kinantakan montok manahak ponulungan.
“Bot Kilat 36 poingkuro poh nga sansagan guminuli kawagu sumusuhut koyuon tawan di au osonong id koiyonon dilo om minonuhu tokou do Kapal Maritim (KM) Memmon minoi id tampat kinantakan kiikira jam 5.25 sosodopon.
“Kolimo-limo kru bot ih au nakaanu minonginsonong kawagu kinaraagon bot katamaran dilo kalapas diri nakaanu pinowaliu doid KM Memmon id jam 7.10 dongotuong om nokorikot id Jeti Susumangod Daat Diraja Malaysia (TLDM) Sepanggar id jam 10 dongotuong,” ka dau.
Minoboros isio do laang tosikap sanganu bot pinoporuput do kinantakan kuminaa bogian Agensi Popogirotkuasa Maritim Malaysia (APMM) nopo nga ahal tagayo munggui nakaanu minanampasi sundung pia puru nokotoguang kooyuon tawau au osonong om daat kiumbak montok rumikot doid tampat kinantakan.
Namot dilo, id ningkokoton misusuai, kakaal poh APMM papanau do karaja mogium om manampasi (SAR) limo kagu munggui bot notorob kaamung limo tutumombului China om songulun kru tulun kinoiyonon kakaal potilombuson.
“Kakaal potilombuson tokou kopomogiuman ih sumuang tadau ko-18 miampai kopohompit do 380 batu nautika persegi id kawaigan Pulau Mengalum om utara Pulau Labuan,” ka dau mikuo minanamba do SAR dilo pinorikud di alaid kopio id Malaysia.