Mitamba papanau karaja projik Pan Borneo Sabah timbangon porinta
KOTA KINABALU: Masaon do porinta monimbang montok papabanar do laang mitamba papanau karaja pialatan kuntirikto Mamasok Sabah miampai komponi labus mantad nangku Semenanjung toiko Sarawak id kapanahakan ‘tender’ om koponguhanan Projek Lebuhraya Pan Borneo Sabah.
Montiri Talun Alun Datuk Seri Fadillah Yusof minoboros do iti sumusuhut kiharo okurangan kuntirikto Mamasok Sabah Tier 1 ih kitoilalaan togumu montok papanau do projik kapamansaian talun alun tagayo.
Minoboros isio do kiginumu 35 komponi toiko kuntirikto pokigunoon montok monuang koinsanai 35 pakej id suriba projik talun alun tagayo dilo, nga, gisom baino diti kiikira 14 komponi noh id Sabah ih noilaan kiharo koponorimaan.
“Pialatan laang noilaan om masaon id kapatantuan nga papabanar do mitamba papanau karaja miampai komponi labus (mantad nangku Semenanjung toiko Sarawak) montok monulung kamampuan kotos kousinan om toilalaan kuntirikto kinoiyonon om nogi papatantu do projik talun alun tagayo diti kapanau miagal di napalan,” ka dau.
Noboros disio ahal dilo kuminaa monunurat abar kalapas pinotimpuun do timpu kapanahakan boboroson popointarang kokomoi kosiwatan ‘pakej’ karaja om kopongobian projik Talun Alun Tagayo Pan Borneo Sabah, ih notindapou nogi di kumoduo dau Datuk Rosnah Abdul Rashid Shirlin, hiti koniab.
Minoboros ih Fadillah do kogumuan kuntirikto Mamasok Sabah ih haro timpu diti au katanud do kooturan pinatantu sabap do montok lontikon sabaagi kuntirikto tagayo potontuon iyolo mantad kawo ‘teknikal’, toilalaan om injin suai ko haro kotos kousinan sokurangkurang do RM100 riong.
“Maya laang miapu/ mitamba winakas karaja dilo, 30 paratus noh komponi labus (Semenanjung toiko Sarawak) pinabanar do misokodung miampai kuntirikto Sabah. Kuntirikto Sabah momuruan projik katapi mositi mogium koruhang kongsi montok papanau do projik dilo sabap tumanud kooturan di pinatatap au ogumu otorimo (kapaganu tender),” ka dau.
Minoboros nogi ih Fadillah do kiharo doti 35 pakej ih posodiaon maya do projik talun alun tagayo dilo maan pokodoo om piomungon mooi do kuntirikto Mamasok Sabah ih linantik haro katabaian papanau do pakej dilo.
Ka dau minggisom nogi o komontirian dau poposigampot do gaab porinta montok papatantu do kuntirikto om poposodia bakaang pamansaian id Sabah nogi songowian ngawi kapaganu kotundaan maya do kapamansaian projik talun alun tagayo dilo.
Gisom baino diti, noboros di Fadillah do wookon mantad 35 pakej talun alun tagayo dilo masaon papanaon, pialatan suai kopohompit do pamansaian ralan PaparDonggongon; Tawau-Semporna; om barisan Pomotingan Lahad Datu.
Id ahal dilo, minoboros ih Fadillah, komontirian dau papanau do 36 projik id Sabah maya Bajet Kotundaan montok Palan Obuli Mundaliu 2, Pamalanan Malaysia Ko11 (2017-2018) ih kaampai mantad 10 projik kawawagu om 26 projik oputan kigatang RM3.881 bilion.
Projik ngawi dilo kaampai mantad karaja ngawi pamansaian om popoinggayo ralan om karaja ngawi pongumbasian ralan otidong, ka dau. - Bernama