Songuhun noduso, tohu nosinduahan nokosingud gas kavanit ontok kapal id pindahanan papaatod vagas doid kavaigan Filipina
KOTA KINABALU: Songuhun kru kapal noduso om tohu vagu nosinduahan kahapas nokosingud gas kavanit idsuang kapal ontok id pindahanan papaatod vagas id kavaigan Filipina id jam 4 minsusuvab, kiikila 117 batu nautika mantad doiti.
Munggui nointutunan sabaagi Hoang Van Chuyen, 33, pinatantu do minidu pogun id kapal Vietnam MV Vimaru Pearl ih mamanau mantad kakadazan Ho Chin Mieh, Vietnam pougadan doid Filipina.
Huguan Pulis Uvang Kota Kinabalu Asisten Komisioner M Chandra minoboos do kinantakan kiikila jam 5.55 sosodopon dino kopoompit do iso kapal ih mogovit vagas soginumu 6,300 tan pougadan doid Filipina.
“Ontok kinantakan munggui om tohu vagu kru kapal masaon papanau kalaja sabaagi injiniol id boogizan hinimput injin kapal ih kivaa id kavaigan sompomogunan piahatan Filipina om Vietnam.
“Munggui om kru kapal suvai kahapas dino pinoluput do kopiuman au osongkuo avasi om nakakandai osusaan momuhobo poguhui munggui nahadan miampai minonigovo om au nokopiuman tinan,” ka disido id iso kopoihaan doiti koniab.
Tumanud disido kapal kargo ih minogovit 21 kru kapal dino kahapas dino nokoikot id Hihikiton Kota Kinabalu doiti kahapas kapten kapal tuminuubung hihikiton poindoos montok kapaganu do sakadai.
“Pomolisaan timpuuni boogizan Koupisan Bomba om Mongumohig Malaysia (JBPM) om boogizan ambulans nokoiho do munggui minidu pogun sabap do nokosingud gas kavo carbon monoxide.
“Tohu munggui kiumul 27 gisom 32 toun ih nokosingud gas baino masaon pokiusapan id Hospital Queen Elizabeth (HQE) Kota Kinabalu om kivaa id koozuvon avasi,” ka disido mikuo minanamba do kakaal po boogizan dau papanau do ponoizukan potihombus kokomoi do kes dino.
Namot dino, Panakadai Potunud Boogizan Operasi JBPM Sabah Kahirul Azwan Ibrahim minoboos do nokotoimo o boogizan dau do pamahaavan kaagaban mantad boogizan Hihikiton Kota Kinabalu id jam 2.34 sosodopon ih momoguno do sakadai kopongumohigan kopoompit do bakaang kimia kohigogon.
“Songian nopo kapal kargo huminokit id Jeti Hihikiton Kota Kinabalu id jam 6.30 sosodopon, puu bomba suminikap pinapanau do kalaja kopongumohigan miampai pinapahabus munggui mantad kapal dino.
“Tohu munggui kivaa id koozuvon avasi (stabil) om songuhun munggui pinatantu do minidu pogun di boogizan hamin pongusapan om pinaatod doid HQE montok haang potihombus,” ka disido.
Tumanud dau papanau kalaja kopongumohigan kopohompit do 35 upisol om puu kaamung Tinimungan Unit Bakaang Kohigogon (Hazmat) om EMRS mantad Balai Bomba om Mongumohig (BBP) Kota Kinabalu, Lintas om Penampang.