Abaabayan panggajian om pongiyonan kawagu PATI id Sabah solinaid onom wulan tumimpuun baino
KOTA KINABALU: Koupisan Imigresen Sabah papanau do abaabayan Panggajian om Pongiyonan Kawagu Modidikot Songkosuaian Aiso Kasagaan (PATI) (Program Rehiring) id Sabah solinaid onom wulan, tumimpuun suab (baino).
Potunud Koupisan Imigresen Sabah, Musa Sulaiman minoboros do abaabayan dilo kitujuan manahak kosiwatan kumaa PATI ih pakaraja miampai tolosok id Malaysia, doulu noh id Sabah, onuan pomit karaja totopot montok mongorulan kobolingkangan okurangan pakaraja id pomorunan ngawi pakarajaan di pinabanar.
Ka dau abaabayan dilo nogi popomilo doti do porinta mongilo do ginumu tototopot PATI id suang pogun montok tujuan pongintongan om momogonop do kogunoon ‘senario’ koumoligan pogun.
“Program ‘Rehiring’ maan papanao miampai miingat-ingat om atamangan mooi do au antakan kes ngawi ponipuan mantad tulun ngawi aiso tonggungan ih kuminam maganu kosiwatan mogium kountungan mantad PATI. Montok tujuan diti, koporintaan pogun mongontok do kooturan togirot nokomoi PATI om touki montok umampai do ‘Program Rehiring’,” ka dau kuminaa monunurat abar hiti koniab.
Tumanud Musa pialatan kooturan di apatut tonudon do PATI nga haro rikod kinosuangon timpuuni miampai oulud doid Malaysia ilo nopo nga iyolo ih poingiyon nokolobi timpu om Pas Kakapan (Karana Naamot) om masaon pakaraja miampai touki ih iso’i.
Ka dau kooturan suai nopo nga PATI dino nokomoi nogi nokoiyon nokolobi timpu momoguno Pas Kakapan (Karaja Naamot) om masaon pakaraja miampai touki wagu om PATI ih poingiyon nokolobi timpu momoguno Pas Kakapan (Sosial) om masaon pakaraja miampai touki om koinsanai PATI dilo mositi koidu mantad rikod jinayah.
Tumanud dau koponguhanan Panggajian om Pongiyonan Kawagu PATI dino nokomoi nogi tumanud doid bogian di pinabanar noopo ilo nopo nga bogian pomutanaman, pamakabunan, pamansaian, om kotorinaan.
“Abaabayan diti bulun noh kopohompit do duo karayatan pogun noopo ilo nopo nga Indonesia om Filipina. Montok papanau do abaabayan ‘Rehiring’ diti, koporintaan pogun (Sabah) nakapamalantik noh Syarikat Inti Padu Technology montok papanau do koporijistaran abaabayan Panggajian om Pongiyonan Kawagu PATI id Sabah,” ka dau.
Nunu noopo ponguhotan obuli sumuku doid Bogian Pakaraja Songkosuaian, Koupisan Imigresen Kota Kinabalu potitikid tadau pakaraja mantad 8.30 kosuabon gisom 5 sosodopon maya numbur 088-488586/088488775 om Syarikat Inti Padu Technology id numbur 088-201418/088-201419.Bernama