Agensi aparagat papanau susuap osiliu pongintongan SPRM Sabah - Sazali
KOTA KINABALU: Kapatantuan nokomoi agensi toiko koupisan di aparagat papanau do susuap osiliu pongintongan tagayo Tinan Monorina Pomunsan Susuap Malaysia (SPRM) Sabah toun diti.
Potunud SPRM Sabah Datuk Sazali Salbi minoboros do karaja koiso SPRM dilo papanaon maya Abaabayan ‘Corruption Risk Assessment’ (CRA).
Papanau o bogian dau do ponoriukan kopohompit do ruputan om kopoilaan mantad piipiro toun nakatalib nokomoi piipiro agensi, koupisan om komontirian di okitonan aparagat papanau do susuap.
Tumanud dau gisom timpu diti kiharo piipiro agensi om koupisan di nosiliu pongintongan katapi au poh obuli pointarangon sabap kakaal id kopoindalanan ponoriukan.
“CRA nopo nga karaja ngawi koiso dotokou toun diti om montok onom wulan koiso diti papanau tokou do ponoriukan montok mongilo nonggo-nonggo agensi toiko koupisan di aparagat doid susuap.
“Kapatantuan diti nogi montok mintong koinsaruan agensi toiko koupisan dilo poompiton miampai ruputan susuap.
“Montok rontob koduo toun diti, SPRM maganu laang nokomoi bogian kikoompitan tumanud doid ponoriukan di pinapanau,” ka dau.
Noboros disio ahal dilo id pitimbungakan abar kalapas Abaabayan Kapanahakan Karaja Potunud SPRM Sabah, hiti koniab.
Suai ko ilo pinatarang dau do soriukon nogi do SPRM o ginumu poruntukan kotundaan di pinatahak do koporintaan Pisompuruan toiko pogun kuminaa agensi om koupisan dilo.
Minoboros ih Sazali do ponoriukan di wonsoyon dilo montok mongilo otootopot nangku poruntukan di pinatahak dilo nokorikot kumaa rayat.
“Manahak tokou nogi pongintongan doid ‘perspektif’ tulun ngawi nokomoi kotorinaan di pinosodia do agensi om koupisan.
“Maya abaabayan ‘walkabout’, yoho miampai upisor SPRM ih suai milongot miampai tombului ngawi agensi diti.
“Tolimbusan iyolo do monguhot kokomoi ‘persepsi’ nokomoi kotorinaan agensi hinonggo iyolo mokitorina,” ka dau.
Ka dau asil mantad pinonimbar tombului di notorimo, ilo maan timungo montok ponoriukan potilombus.
Idsuang ahal dilo, alansan kopio o bogian dau tuh potitikid pakakaraja tulun ginumuan kaanu manahak pisokodungan tosonong kumaa SPRM sabaagi laang montok manangod susuap.
Pinosorou nogi disio tuh potitikid pakakaraja tulun ginumuan katanud do toinsanan ‘prosedur’ om kooturan di pinatantu.
“Sokiro ko haro kopoilaan kokomoi susuap, tulun ginumuan mositi rumikot om poporoput doid SPRM.
“Haro duo undang-undang pongoligan tokou kaamung noh Akta Pongoligan Saksi 2009.
“Undang-undang diti gunoon montok moningolig tulun ih mananahak kopoilaan toiko saksi,” ka dau.
Sazali pogului diti pakaraja sabaagi Kumoduo Potunud Wanan Bogian Ponoriukan SPRM Puterajaya.
Linantik isio sabaagi Potunud SPRM Sabah montok mamaganti di Datuk Shaharom Nizam Abd. Manap.
Shaharom baino diti pakaraja sabaagi Boyoon Upisor Integriti Prasarana Malaysia Berhad.