Kereta api nakalanggar van # Tolu noduso, apat kagu kaamung tanak nosindualan

BEAUFORT: Tolu tulun pinatantu do minidu pogun, om apat kaamung songulun tanak nosindualan id koligaganan kopohompit do kereta api nakalanggar iso van id Kampung Memanjang, hiti, kiikira jam 2.40 sosodopon koniab.

Luguan Balai Bomba om Mongumolig (BBP) Beaufort Runzee Abd Thani minoboros do kinantakan nantakan ontok kereta api dino id pindalanan mantad Stesen Tanjung Aru pakaayan id Stesen Beaufort.

“Korikot nopo id tampat kinantakan, van kawo Toyota Liteace ih minogowit turu tulun susumakai tuminalib ralan pogului nalanggar kereta api kawo ih pinoput-oput (satu gerabak).

“Asil kinoligaganan natadon do tolu munggui pinatantu do noduso om apat ih suai kaamung tanak kiumur kiikira sontoun lobi nokotoguang mogisusuai nosindualan,” ka dau.

Minoboros isio do nokotorimo o bogian dau do pamalahauan kaagaban id jam 2.57 sosodopon om minonuhu do 10 puru BBP minoi id tampat kinantakan.

Korikot nopo id tampat kinantakan, suminikap o puru dau pinapaatod songulun munggui sumukod tondu doid lamin pongusapan Beaufort montok pokiubatan potilombus minomoguno do padsakaian EMRS om duo kagu munggui nosindualan pinaatod doid lamin pongusapan miampai tinulung do tulun ginumuan.

“Piipiro puru suai sansagan papanau do karaja kapanampasian miampai minomutul tinan padsakaian montok papalabus songulun munggui tondu mantad bogian suriba korita dilo.

“Sinansagan tokou nogi minomutul kogos tawak koumoligan tuh kaanu papalabus papapanau kiumur 50 toun ih nagansip id bogian papapanau om minangakat songulun munggui tondu ih nakagawad nakalabus mantad van ontok kinantakan,” ka disio om minanam ba do kotolu-tolu munggui pinatantu do minidu pogun notilombus id tampat kinantakan.

Minoboros isio do tolu munggui pinatantu do noduso om apat kagu susumakai van ih nosindualan kaamung songulun tanak kiumur kiikira sontoun lobi baino masaon pokiubatan id Hospital Beaufort.

Kawagu dau puru bomba kalapas dilo pinapanau do karaja pambarakasan id tampat kinantakan doulu noh id sawat ralan montok mongilag do nunu noopo kobolingkangan suai antakan.

Tumanud dau papanau karaja koinsasanai nopupusan id jam 4.10 sosodopon koniab.

Okitonan puru bomba papanau do karaja ngawi kapanampasian munggui id tampat kinantakan. Iti noh kereta api (gambar tokoodo) ih nokohompit id koligaganan noduso id Kampung Memanjang di sosodopon koniab.

Sapawi (tanga) rumamit tanda kaandaman mantad Musdi. Gambar wanan, Sapawi intongan di Latip om Musdi suminain id ‘plak’ sabaagi tanda pinotimpuun do kulam dilo.

Koyuon id posorili tampat kinantakan kalapas kinoligaganan dilo.

Sapawi songowian Latip om Musdi pinopokito do tanda osonong kalapas pinotimpuun do kulam dilo.