Sapawi mokianu rayat mamagahau kosiwatan pinosodia porinta
SIPITANG: Mogigion ngawi labus kakadaian mositi abarani tumoguang do ponokialitan montok mamagahau kosiwatan ih patahakon do porinta.
Puru Parlimen Sipitang Datuk Sapawi Ahmad minoboros do porinta posodia do mogisusuai kosiwatan montok rayat.
“Kosiwatan dilo apatut gunoon miampai tososonong om au apatut do iman-imanon... mositi abarani tokou montok mamagahau kosiwatan ih posodiaon dilo,” ka disio.
Noboros disio ahal dilo ontok minanahak boboroson pinotimpuun do pongukaban om pialaan mamagapon D’Lubok Perdana id Kampung Lubok Darat, hiti koniab.
Ka disio kosiwatan dilo kaamung noh koposodiaan kounalan pagalasan montok mogigion ngawi labus kakadaian montok umampai id kaganaan poniagaan.
Tumanud disio suai ko katama tumoguang do ponokialitan, mogigion ngawi labus kakadaian nogi apatut kopio apandai momoguno do kosiwatan di haro.
“Poposodia o porinta do kosiwatan dilo sabap muhang popoingkawas do rontob konuonuan (ekonomi) rayat,” ka disio.
Kokomoi pialaan mamagapon dilo, noboros di Sapawi do ilo nopo nga iso mantad laang montok popogirot do pisompuruan om piunungan rayat mogisusuai tinaru.
Ka disio, kaampayatan togumu kopongukab liwang montok rayat do mogiboboros montok papawakas do pisompuruan om piunungan di posodia haro.
Tumanud disio kaparagatan dilo nopo nga ponguyatan tinan di kiguno om kangaam kopio potilombuson ontok timpu rumikot.
Nokotindapou nogi id abaabayan dilo kaamung noh Upisor Watas Sipitang Latip Amat om Monijor Kulam D’Lubok Musdi Tawar.
Lobi 800 tulun tuminanud do pialaan dilo ih poposodia do wawa kamanang koiso RM15 noribu om tampat koduo om kotolu sompori-pori koponorimo wawa kiginumu RM5,000 om RM2,500.