Papapanau noduso motosikal nakalanggar bas
BEAUFORT: Songulun papapanau motosikal noduso kalapas motosikal ih pinapanau disio natagakan kapadtamangan pogului nokosuang id ralan pisulakan om kopilanggar miampai iso bas id Kilometer 4 Ralan BeaufortSipitang, sodop tadau Koiso nakatalib.
Munggui nointutunan sabaagi Janial Matah, 60, songulun nokopinsin Koupisan Talun Alun (JKR) natadon mantad Kampung Maraba Beaufort.
Luguan Pulis Watas Beaufort Deputi Superintendan Azmir Abd Razak minoboros do kinantakan kiikira jam 8 dongotuong dilo nantakan soira papapanau motosikal dilo id pindalanan mantad Kakadaian Beaufort pakaayan id Kampung Maraba.
“Korikot nopo id tampat kinantakan, motosikal ih pinapanau munggui natagakan kapadtamangan pogului nakatangkid doid ralan pisulakan ponong wanan.
“Kinantakan natadon motosikal dilo nokopilanggar miampai iso bas ih rumikot mantad Weston pakaayan id Kota Kinabalu,” ka disio.
Minoboros isio do asil kinoligaganan dilo kinontodonon munggui noindamaan nosindualan id ponong tulu pogului pinatantu do minidu pogun id tampat kinantakan, papapanau bas om susumakai dau aiso nunuunu nosindualan.
“Pinonoriukan id tampat kinantakan nokoilo do kinoligaganan dilo natadon mantad munggui ih au nakaanu minanamong motosikal dau.
“Pulis poingkuro poh nga maganu poniisan sampel raha munggui montok papanau do ponoriukan potilombus,” ka disio mikuo minanamba do kes dilo soriukon tumanud Seksyen 41 (1) Akta Padsakaian Ralan 1987.
Namot dilo, id kinantakan misusuai, songulun papapanau motosikal nakakandai nosindualan notipu ih ponong poo wanan kalapas minamalanggar ponong tohuri iso korita Perodua Viva id Kilometer 1.5 Ralan Beaufort-Sipitang.
Minoboros Azmir do kinantakan dilo nantakan soira korita Perodua Viva id pindalanan lumabus simpang One Beaufort om pakaayan id disan wanan ralan montok sumuang ralan tagayo pogului linanggar motosikal ih rumikot mantad ralan tagayo.
“Papapanau motosikal ih notipu id ponong poo wanan kalapas dilo pinaatod doid lamin pongusapan songindoros montok pokiubatan potilombus om papapanau Perodua Viva aiso nunuunu nosindualan,” ka disio.