Sunduan miskodung, piunungan ‘ramuan’ kiguno papagaras Umno

# Montok papataru do parti kotilombus ‘relevan’ kumaa rayat, ka di Sapawi

BEAUFORT: Sunduan misokodung om piunungan nopo nga ahal (ramuan) ih kiguno kopio montok papatantu do kagarasan Umno kotilombus koingkawas.

Luguan Kopoilaan Umno Sabah Datuk Sapawi Ahmad minoboros do kagarasan Umno dilo noh ih papataru do parti montok kotilombus ‘relevan’ montok rayat.

“Kagarasan dilo tantu noopo au kaanu mingkawas nung au tokou muhang momonsoi toiko papaharo do sunduan misokodung om piunungan di tawakas,” ka disio ontok korumai kalapas pinapaharo do kakapan doid Bilik Gerakan Umno Beaufort om Sipitang, hiti koniab.

Isio ih nogi ponorikohon ‘War Room’ ih minomoyoon do sontonudon komiti karaja Tinan Piturubungan Umno Sabah minoboros do rayat kotumboyo om otumbayaan kumaa Umno sabap sunduan misokodung piunungan di pinokito.

Sontonudon dilo nogi nampayat di Monunurat Eksekutif Umno Sabah Datuk Kadzim M Yahya om Luguan Upisor Sistom Kopoilaan om Data Pulitik Umno Datuk Jaafar Uttong.

Minoboros ih Sapawi do koponumboyo om kotumbayaan rayat dilo noh nogi ih papataru do Umno kotilombus ‘relevan’ gisom baino diti.

Tumanud disio, sunduan irad dilo mositi haro id pialatan puru Umno id toinsanan bogian mooi do kotumbayanan rayat kumaa Umno au atalup.

Idsuang ahal dilo, alansan kopio ih Sapawi tuh puru Umno id toinsanan bogian au monorimo nonggo-nonggo puru ih kuminam momunso do sunduan pisokodungan om piunungan di posodia haro.

Ka disio puru parti ih haro koulalahon irad dilo apatut kopio iduon om obuli lumabus mantad Umno.

“Nung haro parti ih orohian popiodu ngawi do nuludan kopomuruanan, om isio kangaam kopio polobuson mantad Umno sabap parti okon momoguno doid ‘kuantiti’ katapi Umno lumansan doid ‘kualiti’,” ka disio.

Id ahal dilo, kapamagatang kopio ih Sapawi kumaa Umno Beaufort om Sipitang ih tumilombus minsomok rayat gisom nakaanu minaganu kawagu kotumbayanan diolo.

Ka disio karaja ih pinoburu do nuludan kopomuruanan bogian mositi onuan do sokodung mantad nuludan kopomuruanan bogian raan.

“Onu ih atalang kopio rayat maid-laid kotumboyo om otumbayaan kumaa Umno om toinsanan diti nopo nga karaja potilombus mantad nuludan kopomuruanan bogian om nogi raan om alansan kopio tokou do laang om karaja dilo kotilombus om poingkawason,” ka disio.

Sapawi papatahak bondira BN kumaa Luguan Umno Beaufort Datuk Isnin Aliasnih.

Sapawi mokinongou kopointalangan Luguan Umno Beaufort Datuk Isnin Aliasnih ontok kuminakap Bilik Gerakan injin Umno Beaufort.

Sapawi papatahak do kopoilaan nogonop Umno Sipitang kumaa Kadzim kopinamot kinakapan karaja dilo.

Sapawi om Kadzim mokinongou boboroson mantad Monunurat Umno Sipitang Alidin Mohamad ontok kuminakap Bilik Gerakan Umno Sipitang.