Koisaan Kalab Komulakan Suku Tinagas kopohompit walu kampung poimogonon ontok 25 Mac diti
RANAU: Koisaan Kalab Komulakan suku Tinagas ih kopohompit do walu kampung posorili watas diti potimpuunon doti ontok 25 Mac diti.
Ino pohoroon id koiyonon Bawang Sugut Kampung Malinsau (Bulukunon) kiikira 60 kilometer mantad kakadaian, ih maan potimpuuno di puru Parlimen Ranau, Datuk Dr Ewon Ebin.
Irad dino noh pinoboros di Ponorikohon Koisaan Jackson Musi ontok isio om sontonudon puru koisaan dino pinapaharo do kotombuluian tapantang kumaa di Ewon id Kota Kinablu di kawawagu.
Tumanud dau, kopotimpuunan dilo pohoroon montok monimung koinsanai komulakan suku Tinagas pointongkop watas diti miampai popogirot do piombalutan om pisompuruan pialatan iso miampai suai om nogi kaanu mongintutun momuruan ngawi miampai lobi opipit kagu.
Alapon nogi dau o toinsanan suku Tinagas mantad pointongkop Sabah montok sumaasi do kopoimaganan dilo ih otindapou nogi di Panakadai Montiri Koporintaan Kinoiyonon om Pomulaminan ih nogi Puru Lamihn Koundangan Pogun (Adun) Kundasang, Datuk Dr Joachim Gunsalam.
Pialatan kaparagatan kagayat kaharo kopinamot do kopoimaganan dilo kaamung noh pokitonan atlit papagayo tinan, pokitonan suminding, popokito do pakaian koubasanan mantad komulakan (kusai/tondu) Tinagas om pialaan korita 4WD.
“Suai ko ilo, manganjur nogi o koisaan diti do pialaan mimbuul siam misampaping om sipoot rayat miagal migayat dukug, rampanau, om pialaan sayau magunatip,” ka dau.
Miontong koisaan kalab dino, Joespat Majail minoboros do ontok dongosodop pogului kopoimaganan dino, haro nogi kosiwatan do suku Tinagas do mokinongou boboboroson popointalang kokomoi ‘Hak Asasi Tana Mogigion Sandad (NCR).
Kopinamot kotombuluian dilo, pinapatahak nogi Ewon do cek kiginumu RM5,000 sabaagi ponoluodan dau kumaa koisaan dilo.
Nakaampai nogi id kotombuluian dino, Kumoduo Ponorikohon Sanir Tumas, Bendahari Maslah Rompado, Monunurat Leester Dalimon om Upisor Piturubungan Parlimen Ranau, Alyiu Zinin.