‘Kada koompuong, om tutumanud’

# Kopoingatan di Musa kumaa rayat nokomoi ponombirangan pambangkang

KUNDASANG: Pokionuon di Boyoon Montiri Datuk Seri Musa Aman o mogigion Sabah tumilombus miwoyo do koporintaan Barisan Nasional (BN) montok papanau do toinsanan pamalanan montok popotounda pogun dilo.

Tumanud dau koporintaan BN toririmo koilo om maganu kawagatan nokomoi kogunoon om kopokionuon rayat montok papatantu Sabah kotilombus koburu.

“Kada tokou ompuong toiko tutumanud ngawi miampai parti pambangkang ih haro momuruan ‘gila kuasa’ montok sumiliu calon om au nasantaban ginawo miampai parti gulu poh.

“Katapi lobi osonong rayat mositi tumilombus mitanud miampai koporintaan BN ih karati miampai kopokionuon rayat,” ka dau ontok minanahak boboroson ontok pinapaharo do kakapan id Tamu Bogian Rukun Tetangga (KRT) Kundasang, hiti koniab.

Nokotindapou nogi ih Montiri Ponombuluian, Koubasanan om Kinoiyonon Posorili Sabah Datuk Seri Masidi Manjun, Puru Parlimen Ranau, Datuk Dr Ewon Ebin om Puru Lamin Koundangan Pogun Kundasan, Datuk Dr. Joachim Gunsalam.

Tumanud Musa, parti pambangkang maganu kosiwatan noopo montok popoompuong rayat miampai popimboros do nunu noopo pongindaraatan kaamung noh minoboros do nobingkarap o Yayasan Sabah.

“Toinsanan diti pongindaraatan di au otopot sabap Yayasan Sabah haro harata lobi RM14 bilion om haro kousinan kiginumu RM420 riong.

“Suai ko ilo tokou haro universiti om kolej om ogumu susumikul ih nakaanu noh sakadai (tajaan) montok popotilombus do balajaran gisom doid labus pogun...om poingkuo iyolo (momuruan pambangkang) moboros Yayasan Sabah baino diti ‘sumakit’?,” ka dau.

Namot dino, kikalansanan nogi ih Musa do mogigion Kundasang toririmo papatantu do watas dino ogompi om tamangan miampai tososonong mantad kawo kolidangan montok mamagayat lobi ogumu tulun rumikot.

“Kundasang nopo nga iso tiyonon di tosonong kopio om nosiliu pialatan longkod pongintongan tutumombului montok rumikot id Sabah.

“Ino haro pamagayatan kagayat miagal Nuluw Nabalu, koyuon tawan di osogit/atamis om ogumu kinotuan om kouwaan ngawi. Minggisom nogi o porinta popoingkawas do nunu noopo kounalan (infrastruktur) montok kapasanangan tutumombului ngawi ih rumikot hiti,” ka dau. -Bernama

Musa (tolu mantad gibang) nokosiwat nogi ruminuba miampai Puan Mariana Taliban, Ponorikohon Koisaan Mamaamajak om Momukadai Tokoodo Kinotuan Mamasok (limo mantad wanan) om minokinongou kobolingkangan mantad koisaan songowian Masidi (gibang kopio), Ewon...

Musa (tanga) songowian Potunud Yayasan Sabah, Datuk Sapawi Ahmad (tolu wanan), ontok pinotimpuun do ‘Roadshow’ Yayasan Sabah Songowian Rayat Bogian Zon Pantai Barat Selatan id Dewan Masyarakat Tun Hamdan Tamparuli koniab. Okitonan nogi ih (mantad...