KYS maid-laid awakas, abaabayan tumongkop manahak mogisusuai kosiwatan: Musa

Abaabayan Tumongkop (Roadshow) Yayasan Sabah Songowian Rayat id Tamparuli nopo nga iso mantad laang koporintaan pogun montok popointarang kumaa rayat kokomoi do kosiwatan om kinodimpotan Tinimungan Yayasan Sabah (KYS) solinaid diti.

Minoboros ih Boyoon Montiri Datuk Seri Musa Aman do tumongkop dino nogi sabaagi tanda mangamu-amu panandasan di au otopot mantad bogian pambangkang ih minoboros do Tinimungan Yayasan Sabah (KYS) baino diti ‘sumakit’ om ‘nobingkarap’.

“Suai mantad minampayat ngawi pinopokito do ‘produk inovasi’ ih pinalabus, pomiran balajaran ih pinoburu nogi kapanahak do kosiwatan kumaa tanak ngawi mogigion hiti kapaganu do kopoilaan kokomoi do tinan balajaran tulun ginumuan om misosondiri.

“Iti noh pialatan karaja tokou solinaid diti om pomiran irad dino nopo nga ponokotanda do panandasan pambangkang kumaa dotokou nopo nga au otopot,” ka dau ontok pinotimpuun do Tumongkop Yayasan Sabah Songowian Rayat bogian Zon Pantai Barat Selatan koniab.

Minoboros isio do Yayasan Sabah haro harata kigatang RM14 bilion om kousinan ih nokolobi RM420 riong. Minanahak nogi Yayasan Sabah do riongan ringgit id okitonan sikulasip tounan.

“Mantad dilo, posorohon ku o rayat tuh au otombirangan di bogian pambangkang. Papanau do karaja nopo nga lobi osonong mantad do koilo mimboros noopo.

“Rayat hiti mositi do apandai mogundi calon Barisan Nasional (BN) ontok pomilian timpu rumikot.

“Miampai haro lansanon rayat BN hiti, tantu noh do kaganaan balajaran om pomutanaman kaanu popotounda montok momodimpot koburuon om kaanu nogi manahak asil kumaa rayat,” ka disio.

Minanahak nogi ih Musa do jaminan do toririmo porinta papatantu do rayat kaanu kopongoligan di kangaam kopio.

Nokotindapou nogi id abaabayan dino nga Montiri Sains, Teknologi om Inovasi (MOSTI) Datuk Seri Panglima Wilfred Madius Tangau, Montiri Koporintaan Kinoiyonon om Pomulaminan ih nogi Puru Lamin Koundangan Pogun (ADUN) Sulaman Datuk Seri Panglima Hajiji Haji Noor, Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun, Adun Kiulu Datuk Joniston Bangkuai, Boyoon Kopoilaan Parti Bersatu Sabah (PBS) Datuk Jahid Jahim, Potunud Yayasan Sabah ih nogi Puru Parlimen Sipitang Datuk Sapawi Ahmad om tombului tapantang suai.