‘Roadshow’ Yayasan Sabah Songowian Rayat liwang tosonong montok mogirurumoh: Sapawi
Kinapaharaan do Tumongkop (Roadshow) Yayasan Sabah Songowian Rayat nopo nga montok popointarang do ningkokoton abaabayan ngawi ‘sosial’ ih pinapanau gisom baino, ka di Potunud Yayasan Sabah, Datuk Sapawi Ahmad.
Ka disio, ino nogi manahak liwang kumaa momuruan ngawi montok mogiruruba mogiboboros miampai mogigion ngawi kinoiyonon suai ko kaanu popogirot do pisokodungan id pialatan agensi koporintaan pogun om Longkod.
“Maya pomiran balajaran di pinaharo, alansan kopio oku do tulun ngawi hiti obuli kapaganu do kopoilaan potilombus kokomoi do kosiwatan ngawi balajaran di posodiaon id Sabah om Malaysia nogi.
“Kopinamot miampai tumongkop diti, manahak nogi o Tinimungan Yayasan Sabah (KYS) do ‘rebat’ kiginumu 20 paratus montok pambaraian noponu pinalasan id kaunter pangampunan minolos balajaran,” ka disio kumaa monunurat abar id abaabayan Tumongkop Yayasan Sabah Songowian Rayat ih pinotimpuun di Boyoon Montiri Datuk Seri Musa Aman id Tamparuli koniab.
Nokotindapou nogi id abaabayan dino nga ih Montiri Sanis, Teknologi om Inovasi (MOSTI) Datuk Seri Panglima Wilfred Madius Tangau, Montiri Koporintaan Kinoiyonon om Pomulaminan ih nogi Puru Lamin Koundangan Pogun (Adun) Sulaman Datuk Seri Panglima Hajiji Mohd Noor, Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun, Adun Kiulu Datuk Joniston Bangkuai, Boyoon Kopoilaan Parti Bersatu Sabah (PBS) Datuk Jahid Jahim om tombului tapantang suai.
Ka disio, montok koinsasanai dino kiginumu 190, 560 tulun mantad Zon Pantai Barat Selatan nakaanu noh asil mantad abaabayan KYS id Zon diti miampai nakabalanja kiginumu RM6 riong mantad 2004 gisom 2016.
Suai ko ilo ka disio, mantad podi 2010 nakaanu nogi KYS pinapaharo do Abaabayan Kampung Kinangaian Tosonong om Haro Ponginwaguan (PDCB) sabaagi iso karaja monulung mogigion kinoiyonon.
“Abaabayan ih potilombus diti nopo nga iso laang om karaja monulung mogigion id bogian labus kakadaian miampai manahak pongintongan iso-iso kakampungan.
“Id Zon Pantai Barat Selatan, kiginumu 75 abaabayan nakapanau noh om nakapanahak asil kumaa kiginumu 4,531 mogigion kinoiyonon miampai kos koinsasanai RM191,774,” ka disio.
Sapawi ih nogi Puru Parlimen Sipitang minoboros do maya do PDCB, KYS tumilombus papanau do tonggungan kiguno montok papanau do karaja porinta montok papatantu do ponimbanan (transformasi) aanu momodimpot di mogigion ngawi kinoiyonon doulu noh id bogian labus kakadaian.