Piala Komulakan: Sabah minogowit muli mato noponu minangala Perak
TANJUNG MALIM: Nakaanu Sabah minogowit muli tolu mato noponu kalapas minangala Perak 1-0 id pisaapan Tinimungan B Piala Komulakan id Stadium UPSI hiti, di songkonihab
Sabah miampai gaab montok kapaganu mato id pisaapan diti nakaanu mato iso noh maya pinonumpasan di Mohd Suzairee Samail id pitanga timpu koiso.
Sundung pia minamain miampai tosonong poompus pinamainan katapi iso gol noh pinotumpos Sabah montok papatantu diolo minomuhu tolu mato noponu.
Kinamanangan tinimungan tomulok diti kiguno kopio sumusuhut kinamanangan tinimungan Liga Perdana Sabah ih minangala Kuantan FA id pinisaapan id Stadium Likas, di tadau Kolimo nakatalib.
Monijor tinimungan, Mohd Yassin Aman ounsikou miampai kinamanangan diti sabap isio om pamain ngawi tantu noh do alansan kopio kopogowit muli tolu mato noponu kalapas kinamanangan koiso minongala Felda United 3-1 pogului diti.
“Iyolo (pamain) pinopokito do pamainan di tosonong id pinisaapan diti sundung pia nakaanu pinopotumpus iso gol noopo,” ka disio.
Kinamanangan dino nogi koponulung tinimungan nokoinsawat doid tukad kolimo id korikohonon liga baino diti.
Nakaanu o pamain ngawi Sabah do ponodokan sunduan mantad susumikul ngawi UPSI mantad Sabah ih nokotindapou minanahak sokodung kuminaa tinimungan tomulok dilo.
Tumilombus Sabah manahak ponokialitan diolo miampai sumaap tinimungan Melaka id Stadium Penampang ontok 23 April diti.