Opod restoran nontok haang undangundang sabap kahasaan ahal kabaakasan
SANDAKAN: Opod restoran taakanan daat id uvang diti nontok haang undang-undang mozo ‘Ops Poimbida Premis Obolisi’ 2017 ih pinapanau di Upis Kohidasan Sandakan di tadau Koiso nakatahib.
Mantad ginumu dino, Upisol Kohidasan Sandakan, Dr Johari Awang Besar minoboos, duvo premis sinuu minonutub kahapas puu Kohidasan nokokito tazam momiumbak ih kaampai mantad langau, lipos om tikus id kadai dino nokomoi.
Tumanud disido, haang dino nokomoi minaan onuo tumanud do Seksyen 11, Akta Taakanan 1983.
Namot dino, tohu premis vagu sinuu mambaakas katanud Seksyen 10, Akta Taakanan 1983 om himo premis vagu nontok kompaun om nonuan notis Seksyen 32B id siibo Kootulan-Kootulan Kabaakasan Taakanan 2009.
Pinapanau nogi o boogizan dau do pomolisaan mahik kumaa doid duvo tinan restoran taakanan daat di au pinapanau kotoinaan ontok pinapanau ‘operasi’ dino.
“Sanganu restoran taakanan daat, restoran koubasanan om nogi gerai-gerai mositi tumanud do kootulan montok mamajamin taakanan ih dagangon kumaa tombuhui ngavi nopo nga oumohig akanon om opoto.
“Mimang tokou tuhun Sandakan posuungon miampai taakanan di obolisi, oumohig om opoto montok momohiad avanit do taakan toi ontok toluo modohiu suvai miaga typhoid, kolera om dysentri,” ka disido.
Operasi poimbida dino nampazat di soginumu 29 puu Kohidasan songovian onom puu Unit Kohidasan Tuhun Ginumuan MPS.