Ponombuluian montok kapaganu do konuonuan, iman-imanon Wulan Tumombului Kiulu 2017 nokosigampot: Joniston
TUARAN:Wulan Tumombului Kiulu ih pinaharo poompus wulan (April 2017) nakaanu minomagampot do iman-imanon kapanganjuran dilo montok popointutun do watas Kiulu sabaagi iso mantad tiyonon ponombuluian labus kakadaian id Sabah.
Puru Lain Koundangan Pogun (ADUN) Kiulu Datuk Joniston Bangkuai minoboros do abaabayan dilo nogi nokopoingkawas do kopurimanan mogigion ngawi Kiulu do bogian ponombuluian osonong kopio silihon iso kagu kotos konuonuan kumaa diolo.
“Katapi ih kiguno kopio opurimanan ku nopo nga Wulan Tumombului Kiulu kopongukab liwang kumaa mogigion kinoiyonon id Kiulu montok papadagang do asil tanom diolo, asil nansakan koubasanan, kakamot kinuama tunturu om susuai poh.
“Nokoilo oku do haro dagang ih korikot RM700, om iti ponokotanda do onu ih haro hiti obuli osiliu iso kagu liwang montok popoingkawas konuonuan mogigion ngawi id Kiulu,” ka disio ontok pinotimpuun do abaabayan koponutuban Wulan Tumombului Kiulu hiti, di tadau Minggu nakatalib.
Isio ih nogi Ponorikohon Tinan Ponombuluian Sabah minoboros do sundung pia Wulan Tumombului Kiulu baino id koimpupuson noh katapi abaabayan ponutuban diti montok wulan Kaapat (April) noopo.
Ka disio ino nopo nga iso koponimpuunan di tosonong om laang opurokis potilombuson montok popoburu do watas Kiulu sabaagi iso tiyonon ponombuluian di kagayat montok tulun ginumuan.
“Haro nogi piipiro pamalann tokou miampai maganu kokiraan ponimbar om sokodung mantad mogisusuai bogian kaamung noh mogigion, momuruan mogigion id Kiulu poingkuro tokou obuli mogiwowoyo ngawi tumounda id tigulu sabaagi laang montok mogowit lobi ogumu tutumombului rumikot id Kiulu, okon noopo tutumombului kinoiyonon katapi nogi sompomogunan,” ka disio.
Noboros di Joniston do Wulan Tumombului Kiulu aiso koompitan miampai pulitik katapi ino nopo nga iso laang om ‘komitmen’ popoburu do pomorunan ponombuluian id watas dilo montok kogunoon konuonuan (ekonomi) mogigion.
Ka disio Kiulu haro kobulihan di lobi tagayo katapi ih kiguno kopio mogigion id watas dilo mositi haro pisokodungan, koposompuruan om piunungan montok songowian ngawi papatantu do ponombuluian kapanahak asil kumaa toinsanan kampung id watas dilo sabap potitikid kampung id Kiulu haro pamagayatan sosondiri.
“Monongkotoluod oku nogi kumaa Boyoon Montiri Sabah Datuk Seri Musa Aman sabap pinopolulus do poruntukan kiginumu RM80,000 montok kapanganjuran Wulan Tumombului Kiulu.
“Boyoon Montiri nga koilo do momoguno tokou do kotundaan labus kakadaian okon noopo mantad kawo kounalan (infrastruktur) katapi mantad kawo pomorunan di obuli mogowit asil kumaa tulun ngawi maya do ponombuluian.
“Pounsikou nogi kumaa sokodung Puru Parlimen Tuaran Datuk Seri Panglima Wilfred Madius Tangau montok pinapalantoi do abaabayan diti,” ka disio.
Id abaabayan dilo, pinopotunui nogi isio do wawa kuminaa nakamanang Pialaan Sumandak Olundus Kiulu ih ponogi abaabayan koimpupuson Wulan Tumombului Kiulu.
Sumandak Olundus Kiulu 2017 namanang di Tati Aniz Lyn Delnes, 18, mantad Kampung Rumindako Kiulu ih lumansan Kiulu mamung id pialaan Unduk Ngadau Nayatan Pogun.
Namot dilo, tampat koduo namanang di Tati Cheldry Pavelly, 18 mantad Kg. Malangang Baru. Om Tati Ivy Clare Kamin, 18 mantad Kg Talungan id tampat kotolu.
Pinopotunui nogi ih Joniston do wawa Pialaan Monupu Sinding Tulu Kiulu. Tampat koiso namanang di Elvin Dainal om Joyce Antonius miampai sinding kitulu ‘Kiulu Cantik, Destinasi Menarik’.
Tampat koduo namanang di Belson Vitalis miampai sinding kitulu ‘Visit Kiulu’ om kotolu namanang di Shaafri Sakin om Santiana Ramli miampai tulu sinding ‘Kiulu, Tanggungjawabku, Kebanggaanku’.