Tina noduso binobog tanak sondiri

# ‘Suspek kikotumbayaan do aharo ahal tutok, minanangod munggui minomoguno tumbak

KOTA BELUD: Songulun tondu nolohing noh noduso kiikira onom jam kalapas kikotumbayaan do binobog di tanak kusai disio ih haro ahal tutok id walai diolo id Kampung Linau, hiti di sodop tadau Koiso nakatalib.

Munggui nointutunan sabaagi Teh Jari, 57, pinatantu do minidu pogun ontok pinokiubatan id Hospital Watas Tuaran kiikira jam 4.40 minsusuab koniab.

Boyoon Pulis Watas Tuaran Superintendan Mohd Zaidi Abdullah (gambar) minoboros do kinantakan dilo nantakan soira ‘suspek’ ih nogi tanak munggui minaganu laang miampai minanangod munggui id walai diolo kiikira jam 10.40 sodop tadau Koiso nakatalib.

Ka disio kinantakan dilo noilaan di songulun kagu tanak dau kiumur 38 toun ih poingiyon id walai misampaping kalapas nokorongou pomogiakan mokitulung mantad mungui.

“Soira suminuang walai munggui, saksi minintong ‘suspek’ minanangkus tuminongkiad walai om nokotigog soira nokoilo munggui au noh kopuriman id liwang tombului id koyuon noponsu raha.

“Munggui kalapas diri pinaatod doid Hospital Watas Tuaran miampai tinulung mogigion kampung montok pokiubatan potilombus,” ka disio.

Minoboros isio do mungggui poingkuro poh nga pinatantu do minidu pogun kiikira onom jam kalapas kinantakan sabap noindamaan nosindualan id ponong longon, kangkab om wuros.

Minoboros ih Zaidi do ‘suspek’ kikotumbayaan do haro ahal tutok om poingiyon songowian ngawi miampai munggui id walai dilo.

“Pinonoriukan timpuuni kinantakan nokoilo do munggui minidu pogun sabap noindamaan nosindualan id longon, kangkab om wuros sabap binobo minomoguno do watang tumbak,” ka disio.

Tumanud disio bogian dau baino diti masaon papanau do karaja mogium munggui ih kiumur 28 toun om mokianu nogi isio pisokodungan tulun togumu ih haro kopoilaan ‘suspek’ tuh rumomut pulis tosisikap.

Ka disio kes diti soriukon tumanud Seksyen 302 Kanun Koinggoritan sabap minamatai.