Pisompuruan, kopogisuaian koubasanan id Sabah minog tolimbuson momogompi: Musa
TAMBUNAN: Pisompuruan om kopogisuaian suku tinaru, koubasanan om kotumbayanan agama id Sabah nopo nga harata kakamot kiguno ih kiguno kopio potilombuson momogompi om gagaon di rayat pogun diti ontok tikid timpu, ka di Boyoon Montiri Datuk Seri Musa Aman.
Minoboros isio do kolumaagan om kopogisuaian ‘seni budaya’ id pogun diti pinoposiliu do Sabah kobilangan om osonong, om nogi haro kolumison om kogingo’an kinoiyonon sandad ih kaanu mamagayat lobi ogumu tutumombului mantad suang om labus pogun.
“Nung gulu poh (korikotan tutumombului id Sabah) iso toiko duo riong noh, katapi baino (korikotan tutumombului korikot gisom) 3.4 riong tulun. Otumbayaan oku (korikotan tutumombului koingkawas) doti limo, onom toiko 10 riong tulun ontok timpu rumikot.
“Mositi ounsikou tokou sabap iyolo (tutumombului) koilo Sabah nopo nga iso pogun di kobilangan om ogingo. Sundung pia tokou kaampai mantad mogisusuai suku tinaru, agama om koubasanan, obuli tokou apasi id koyuon otoonong om olumaag,” ka disio.
Noboros di Musa ahal dilo ontok minanahak boboroson id Abaabayan Koponimpuunan Tadau Kaamatan nayatan pogun 2017 kitulu do ‘Kaamatan Asas Perpaduan’ hiti koniab.
Abaabayan kopoimaganan ih pinotimpuun di Yang Dipertua Negeri Sabah Tun Juhar Mahiruddin dilo, nogi notindapou di Kumoduo Boyoon Montiri Tan Sri Joseph Pairin Kitingan, Montiri Ponombuluian om Koubasanan Datuk Seri Mohamed Nazri Abdul Aziz, om Montiri Kabinet pogun om Pisompuruan.
Minoboros ih Musa do karamaian Tadau Kaamatan ih koubasanan nopo nga royohon di tulun ngawi Kadazan, Dusun om Murut montok poposoribau do kopongunsikaan kumaa asil namatan ngawi parai, kaanu osiliu ‘platform’ montok popogirot sunduan tosonong om nogi kaanu poposiliu Sabah sabaagi ‘model’ tosonong kopio montok popisompuru koubasanan.
Minoboros isio do karamaian dilo nogi nopo nga ‘manifestasi’ kolumaagan rayat id pogun diti montok poimpasi otoonong om misompuru gumirot sundung pia misuai suku tinaru, kotumbayanan om agama.
“Alansn kopio tuh karamaian tadau Kaamatan diti kotilombus kopogirot kagu sunduan pisompuruan montok mamajamin kaandangan, kotoonongan om kolumaagan kotilombus montok koinsanai rayat Sabah.
Id abaabayan dilo, pinapatahak nogi ih Mohamed Nazri do ‘replika cek’ kiginumu RM200,000 kumaa Pairin sabaagi poruntukan pomoruhangan montok Koisaan Koubasanan Kadazan Dusun Sabah (KDCA) montok papalantoi do pangaramitan Tadau Kaamatan ontok toun diti.