Komiti Kaamatan KDCA Kepayan nokotoimo tohuod RM30,000
PENAMPANG: Komiti kapanandakan Tadau Kaamatan nazatan uvang KDCA Kepayan nokotoiko sakadai soginumu RM30,000 mantad Huguan Upisol Eksekutif Tinimungan Kinsabina Sdn Bhd Datuk Francis Goh.
Poniikon dau Gundohing Leonard S. Poyong minoboos do sakadai toi tohuod ih pinataak dino montok balanja vookon mantad kapanganjulan kalamazan dino ih ozuvon ontok 10 Mei dumonto tumimpuun jam 12 tangadau id Hamin Hongkod Koisaan KDCA Penampang.
“Suvai ko ponohuodan montok kalamazan ih ozuvon diti, manaak nogi zi Francis do tohuod montok tuduvan ih iso’i montok apat kampung id Kepayan iho nopo nga Kg Kobusak, Kg Nosoob, Kg Nagasiba om Kg Koidupan.
“Suvai mantad apat kampung diti, soginumu onom kampung id posoihi Kepayan nogi kaanu sakadai ih iso’i montok tuduvan dino,” ka disido doid monunuat abal id iso pitimbungakan abal doiti koniab.
Minoboos isido tohuod ih pinataak di Francis montok kapanandakan kalamazan dino id Kepayan nopo nga au okuang mantad RM100,000 koinsasanai.
Ka disido piahatan abaabazan ngavi ih ozuvon kopinamot kalamazan dino nga Sodop Unduk Ngadau om Piboi’an Sugandoi 7 Mei jam 6 sosodopon id Hinominon Kinsabina,Piboi’anMagagung, Sumazau om abaabazan koponimpuunan nopo nga papanaon ontok 10 Mei id Dewan KDCA tumimpuun jam 12 tangadau.
Namot dino minoboos zi Francis do ontok abaabazan ih papanon ontok 7 Mei dino, iso ‘trailer’ kokomoi filem ‘Huminodun’ patayangon poguhui abaabazan tumimpuun.
“Manaak zou nogi sokodung doid kapahabusan iso album hozou Kadazan doiti id nombo kapatazadan kisit dino todoon ontok koimpupuson vuhan hiti,” ka disido.
Minoboos zi Francis do misokodung papanau kalaja nogi o boogizan disido miampai KDCA ontok timpu tabantahan montok popointutun do asil kakamot kapahabusan (produk) ponombuhuzan id Kepayan.
“Produk ponombuhuzan ih pointangaon tokou diti nopo nga hoohobi doid koubasanan Kadazan, 2018 nopo nga toun Tumombuhui Penampang om produk ponombuhuzan dino kamampu popointutun do koubasanan ih kivaa doiti,” ka disido.