Papavakas monguasa Boos Inggeris
LABUAN: Panitia Boos Inggeris tohu sikul pintangaan id Tana Psiompuuvan Labuan minogisosokodung montok minanganjul Sominal Mongiho Boos Inggeris ih kopoompit do 239 tuhun minampazat.
Timpu koiso sominal pinapanau ontok 26 April nakatahib id Natad Bedaun, SMK Taman Pomuhaminan Bedaun ih nampazat di 115 tuhun susumikul Tingkatan 1 gisom Tingkatan 5.
Notindapou nogi sominal dino di 10 tuhun susumikul SMK Mutiara om winozo di mongingia ‘kaunseling’ Zandi Normaisaraf Abdul Rashid.
Timpu koduo nopo nga pinisokodungan piahatan SMK Mutiara om SMK Lajau ih pinapanau ontok 28 April nakatahib id Dewan Semarak SMK Mutiara om kopoompit do 74 tuhun susumikul SMK Mutiara om 50 tuhun susumikul SMK Lajau.
Sominal ih pinababai di Ikon Mongingia Kabansaan om mongingia kinangazan tavasi Boos Inggeris, Hyginus Lester Junior Lee dino manaak pongintongan poimponu doid koulalahon pambalajalan boos tumanud kopulokisan mogikaakavo (multiple intelligence), kahasaan ginumuan id kopomogunaan boos Inggeris (common errors in English), om ‘petua’ balajal (study tips). Tikid timpu sominal nopo nga montok tohu jam.
Popisamo abaabazan SMK Taman Pomuhaminan Bedaun nga zi Juliana Ochong om Zandi Norsuraya Ismail om SMK Lajau nopo nga Zandi Valarie Eddie.
Pisokodungan piahatan panita okon noopo popogiot vagu sunduvan pisokodungan om kabaahan piahatan susumikul katapi nogi manaak guno doid susumikul id kaganaan pambalajalan boos Inggeris.
Panita Boos Inggeris kotohu-tohu sikul minonongkotohuod om manaak kapamagatangan doid Mohoingon (Pengetua) SMK Mutiara, Louren Abon, Pengetua SMK Taman Pomuhaminan Bedaun, Jijah Mohamad Suhai om Pengetua SMK Lajau, Yusup Mohamad, sabap sokodung di pinataak.