Atag popouhan mahik sikul polinta kohuzungon Inggeris sinokodung
PAPAR: Kosokodung zi Kumoduvo Montili Talun Alun Datuk Rosnah Abdul Rashid Shirlin miampai atag Montili id Koupisan Huguan Montili, Datuk Seri Abdul Rahman Dahlan di kavavagu mooi popoguhi mahik sikul polinta kohuzungan Inggeris id pogun diti.
Tumanud disido, isido piahatan ih nokokinam minomoguno lahan tonudon dino poguhu haid miampai isido sondii kosokodung poimponu atag dino nokomoi pouhanon id pogun diti.
“Nga montok zou sondii onu ii kiguno nopo nga lahan tonudon dino obuli toimoon, pogiboboosan potihombus songovian boogizan kiguno miaga tinimungan momo’ia om kiguno kozo atag komuhakan ngavi kokomoi do lahan tonudon diti,” ka disido ontok kotuubungai monunuat abal id Piboi’an Ragbi Papar 7S Challenge Piala First Mayor id Padang Kakadazan Papar di tadau Minggu.
Minoboos zi Rosnah do atag dino kamampu mogovit susumikul id pogun diti monokiahit miampai kinangazan tavasi id boogizan ‘global’.
“Nga ih mositi kozo intongan tokou nopo nga mantad kavo koponguhanan, suntu dino monimbang dati o polinta poposoibau do sikul ngavi miaga Maktab Rendah Sains Mara (MRSM) ih ponogi sikul ‘elit’, ih mokimamaa do mato balajalan Sains.
“Om obuli tokou mintong diti (lahan tonudon) adadi dati sabaagi iso mantad kogunoon montok poposoibau sikul ‘elit’ ih momoguno nogi do ‘medium’ boos Inggeris sabaagi koponimpuunan,” ka disido.
Id ahal dino, Rosnah ih nogi Puu Parlimen Papar nogi mangatag tu iso komiti tuidongon montok mamagatang om mogiboboos ahal dino miampai hobi potihombus songovian boogizan pointantu tu iho kaanu popotopot.
Minoboos isido do iho avasi montok pouhanon om ontok timpu iso’i mositi kaanu sokodung mantad tinimungan momo’ia om boogizan kikoompitan tu iho kapanaak asil doid susumikul, komuhakan om sinakagon timpu mikot di adadi momuu’an pogun tiinu.