Najib mangatag momonsoi longkod kopongindapuan montok tinimungan tomulok Sabah
KOTA KINABALU: Porinta mangatag montok momonsoi iso longkod kopongindapuan montok papasanang do tinimungan tomulok id Sabah montok papanau do poniagaan.
Luguan Montiri Datuk Seri Najib Tun Razak mangatag ahal dilo montok popomilo do mongindapu mantad tinimungan tomulok Sabah kaanu popotimpuun do poniagaan miampai nunu noopo asil kapalabusan kakamot (produk) id suriba iso taap miagal ih haro id Kuching om nointutunan sabaagi Borneo 744.
“Mangatag oku do longkod dilo wonsoyon id Kota Kinabalu sabaagi tiyonon montok tulun tomulok papanau do poniagaan id iso tiyonon pointantu kopio.
“Sokiro ko kaanu tampat di kangaam montok pamansaian longkod dilo, mangatag oku do ponuridongan iso ‘Bandar Keusahawanan Lautan Biru’ hiti, om kalapas dilo osiliu kakadaian kopongindapuan koduo id pogun diti kalapas Kuching Sarawak,” ka dau ontok pinotimpuun do Abaabayan ‘Gabungan Rakan Entrepreneur Aspirasi Terhebat’ (GREAT) 2017, hiti koniab.
Minoboros isio do iso tinan popisomo miampai Universiti Tulun Ginumuan(UA) om Institusi Ponginabasan Takawas (IPT) om tinan korporat maan wonsoyo montok papanau do abaabayan abaabayan kopongindapuan montok ‘mahasiswa’.
Ka dau, ilo kitujuan montok poposoribau lobi ogumu kagu mongindapu tolumok id Sabah ontok timpu tabantalan.
Minoboros ih Najib do raan Longkod Inovasi om Kreativiti Malaysia (MaGIC) maan turidongo id Sabap montok mongunsub do kotundaan mongindapu, okon ko id kakadaian tagayo noopo katapi nogi id pointongkop pogun.
Ka dau, tinimungan tomulok id Sabah mositi koilo kopio magnu kosiwatan sabap do pogun diti kiharo ogumu kobulihan tosonong id mogisusuai kaganaan montok poburuon.
“Mantad dilo, porinta haro 65 komontirian om agensi ih kikuasa monulung mongindapu miampai nunu noopo kaganaan, kamaung noh popoingkawas kaganaan di pinoburu dilo doid dagang labus.
“Porinta baino ‘prihatin’ kumaa tinimungan tomulok miampai poposodia do mogisusuai ‘inisiatif’ montok diolo, au miagal bogian pointantu ih koilo monongkiwal noopo katapi au papabanta do nuunu nopo montok tulun tomulok.
“Muhang tokou tinimungan tomulok id pogun diti kopuriman timpu tabantalan pogun nopo nga sanganu diolo,” ka dau.
Id ahal dilo, pinoboros nogi di Najib do MaGIC papanau do abaabayan Impact Driven Enterprise Accreditation (IDEA) ontok wulan (Julai) tabantalan.
Ka dau, pialatan iman-imanon tagayo IDEA nopo nga montok manahak do kopoiradan kopongindapuan sosial kumaa komponi ngawi manahak pongintongan poimponu asil om nogi poposodia do kursus kopoingkawasan katabayan kumaa komponi ngawi dilo.
Noboros di Najib do GREAT 2017 nampayat kiikira 5,000 mongindapu om papaapu dilo nopo nga kosiwatan tosonong kopio montok sinakagon tomulok Sabah popoinggumu do toilalaan, karaja tutuduk om kosiwatan sokodung om sakadai mantad mogisusuai agensi.
Nokotindapou nogi id abaabaayn dilo nga Boyoon Montiri Sabah Datuk Seri Panglima Musa Haji Aman om Boyoon Monunurat Perbendaharaan, Komontirian Kousinan Tan Sri Dr Mohd Irwan Serigar Abdullah om Montiri ngawi Kabinet pogun ih suai.