Pisokodungan togirot kiguno
# Montok toinsanan mongindapu maya nunu noopo pongindapuan di poburuon
KOTA KINABALU: Papaharo do pisokodungan togirot poompus papawakas gatang nopo nga kiguno kopio kumaa toinsanan mongindapu au mongiro nunu noopo kawo poniagaan di poburuon.
Minoboros ih Boyoon Montiri Datuk Seri Musa Aman do maya pisokodungan dilo, doulu noh id pialatan toinsanan tinan di koompit kotundaan kopongindapuan, ‘ekosistem’ kopongindapuan di togirot kaanu popburu.
“Ekosistem ih orgirot nopo nga kaanu popoingkawas do poniagaan doid iso rontob di lobi akawas.
“Mantad dilo, pokionuon ku kumaa mongindapu ngawi Sabah montok maganu kosiwatan om momoguno dilo miampai poimponu korikotan mogisusuai agensi porinta om tinan okon porinta (NGO) ih koompit id suang ‘Gabungan Rakan Entrepreneur Aspirasi Terhebat’ (GREAT) 2017.
“Ilo nopo nga ‘platform’ tosonong kopio okon noopo kaanu poposodia do sumuang doid ‘ekosistem’ dilo, katapi nogi poporomut do ‘ekosistem’ kotundaan kopogindapuan nayatan pogun miampai ‘ekosistem’ id bogian kabansaan,” ka dau ontok minanahak boboroson id Abaabayan GREAT 2017, hiti koniab.
Minoboros isio do GREAT 2017 nopo nga kosiwatan tosonong kopio papaamung do toinsanan agensi kotundaan kopongindapuan om NGO kikoompitan kopongindapuan kaanu tumimung id iso tampat om poposodia do karaja rundingan om kosiwatan montok popoburu kagu poniagaan.
Otumbayaan ih Musa do miampai haro nopo koporuan om sunduan takawas om kosiwatan tosonong kopio ih posodiaon maya GREAT, ino popotoboi do sumiliu mongindapu om popoingkawas do mongindapu ngawi id pogun gisom kalantaoi om nogi koponoluod doid kotundaan ekonomi pogun om pisompuruan montok koinsasanai.
“Koilo o porinta do tinimungan mongindapu ngawi doulu noh idsuang bogian mikro, pomorunan tokoodo om osuhatanan (PKS) kotilombus osiliu impoon kumaa kosunion ekonomi pogun.
“Sabap ahal diti, tumilombus o koporintaan pogun minggisom mamalan om papanau do ralan tonudon ngawi kotundaan ekonomi om sosial pogun montok popoingkawas kagu konuonuan om kolumaagan koposion rayat,” ka disio.
Tumaanud dau, idsuang Bajet pogun Sabah 2017, nokopoobi noh koporintaan pogun do kousinan poimbida pomoruhangan kiginumu RM53 riong kumaa piipiro bogian tosonong om tinimungan pokimamaan pointantu.
Ka dau, ilo kaaamung poruntukan tambaan kiginumu RM10 riong montok monokodung kotundaan om kaparagatan kpongindapuan kumaa mongindapu ngawi IKS kaamung abaabayan Kotundaan Mongindapu Kampung.
Minoboros ih Musa do minanahak nogi koporintaan pogun kiginumu RM6 riong geran kumaa Yayasan Usaha Maju (YUM) montok poposodia do lobi ogumu kosiwatan mongindapu mikro doulu noh kumaa tinimungan koonduan montok umampai kaganaan poniagaan id bogian mikro.
“Id Sabah noopo nakaanu noh YUM pinapaharo kiginumu 72,110 tulun mongindapu mikro om ‘optimis’ tokou miampai poruntukan poimbida pinomoruhangan diti sabap ino kaanu manahak asil kumaa kiginumu 658 mongindapu mikro maya Skim Pagalasan Mongindapu,” ka dau. Ka dau, montok rontob kalapas dilo, koporintaan pogun manahak pongintongan doid koponupuan kosiwatan ngawi pandapatan takawas maya ralan gawi kawawagu montok koposunion ekonomi momoguno do toilalaan om ‘digital’.
Nokotindapou nogi id abaabayan dilo nga ih Luguan Montiri Datuk Seri Najib Tun Razak, om Boyoon Monunurat Perbendaharaan om Montiri-Montiri Kabinet Pogun ih suai.