APMM pinapakakung ponginaman mogohimu mogowit sumuang tiinumon kaawuk aiso sukai
LABUAN: Agensi Popogirotkuasa Maritim Malaysia (APMM) nakaanu minagantob ponginaman mogowit sumuang miampai aiso kasagaan tiinumon kaawuk aiso sukai id kawaigan Menumbok, hiti di sodop Kolimo nakatalib.
Potunud Maritim Watas Labuan Kapten Maritim Che Adnan Md Isa minoboros do kinalantaian dilo pinapanau maya do kopoilaan tulun ginumuan suai mantad pinonoriukan potilombus mantad puru APMM.
“Soira nokoilo do kinorikotan bot dino nokomoi puru tokou kalapas diri suminuut bot id kawaigan Pulau Daat kiikira jam 8.55 dongotuong.
“Kiikira 30 minit kalapas dilo, bot ih kikotumbayaan do pohibokan id Menumbok dilo kalapas diri mininsomok id disan Bawang Klias.
“Ontok kinantakan, kiharo piipio ‘suspek’ momirangkat barang montok posuangon id suang lori kiwarana opurak om korita 4WD,” ka dau.
Minoboros isio do soira nopo noilaan di ‘suspek’ o kinorikotan puru APMM id tampat kinantakan, koinsanai ‘suspek’ minaganu laang miampai minogidu om tinongkiadan barang ngawi aiso kasagaan.
“Asil pinomorisaan nokoilo do kiharo soginumu tiinumon kaawuk mogisusuai jenama kaamung noh bir jenama Tiger, Guiness Stout om Corona Extra.
“Tinongkiadan nogi di ‘suspek’ o bot aiso numbur koporijistaran, lori kawo Isuzu, om korita 4WD kawo Honda CRV songowian kunsi korita,” ka dau.
Ka disio koinsanai barangan pinamahauan kiginumu RM187 noribu ilo nopo nga RM17 noribu montok tiinumon kaawuk om RM170 montok goduo-duo padsakaian dilo.
Kawagu dau kes diti soriukon tumanud Akta Kastam 1967.