Apat kaamung sapasang miupusupus tinaan papatayad dadah

BUKIT MERTAJAM: Pulis minanaan apat paaptayad dadah kaamung sapasang miupusupus id pinonugkuan misusuai id posorili watas Seberang Perai Tengah (SPT), hiti di tadau Kotolu om Kaapat.

Boyoo Pulis Watas SPT ACP Nik Ros Azhan Nik Abdul Hamid minoboros do minaganu laang asil kopoilaan om pinonoriukan, sontimungan pulis minanahan sapasang miupusupus kiumur 19 om 23 toun id bogian parkir Kondominium Mutiara, Bandar Perda kiikira jam 11 dongotuong tadau Kaapat.

“Asil pinomorisaan pulis nokokito duo lopot purok roun nokoring kikotumbayaan ganja om siam paket ganja ih nolopot noh montok padagangon, id suang lamin sewa duo miupusupus dilo.

“Siniliu di pasangan o lamin dino montok tiyonon montok pongopian om momolopot kawagu ganja pogului padagangon kumaa momomoli diolo id posorili watas SPT,” ka dau hiti koniab.

Ka dau, nakapanahan nogi pulis do songulun kusai kiumur 36 toun songowian heroin kigatang RM1,000 id Ralan Tanjung Putus, Permatang Pauh hiti om kikotumbayaan do ‘suspek’ id pindalanan papaatod kakamot pogoduan dilo.

Minoboros ih Nik Ros Azhan do duo paket polositik heroin om iso pinomutulan straw dilo nokito pinolisok idsuang kotak gisup kusai dino nokomoi om nakapamagahau nogi pulis do koumatan montok mongisop dadah songowian dau.

Namot dilo, ka dau nakapanahan nogi pulis do songulun kusai ih nogi papatayad dadah id iso bangsal id Ralan Ara Kuda, hiti di tadau Kotolu nakatalib om minamagahau syabu om apat ‘picagari’ kisuang asawir au kopurimon.

Ka dau tumanud dau pinonoriukan, kusai kiumur 35 toun dilo nogi ‘positif’ dadah om nointutunan nogi isio sabaagi ‘mat sumpit’ sabap orohian manakau sapi miampai monopuk tayam piarahon tulun pogului manakau om padagangon kumaa ‘sindiket’.

“Suspek momoguno do asawir au kopurimon om paip PVC montok monopuk sapi om asil pinanahanan kusai dilo otumbayaan o pulis do kaanu manalasai do piipiro kes kapanahakan sapi piarahon id watas SPT,” ka dau.

Minoboros isio do toinsanan diolo ih tinaan dilo baino noriman solinaid turu tadau montok monulung ponoriukan om kes soriukon tumanud Seksyen 39 B Akta Dadah Koligogon 1952.-Bernama