Pambangkang aiso ahal montok timpu tabantalan pogun - Najib
Liow: 882,811 susumakai momoguno Tutubpoon Kapal Tumulud Sandakan di toun nakatalib
SANDAKAN: Kogumuo susumakai ih momoguno do Tutubpoon Kapal Tumulud Sandakan id toun nakatalib nopo kiginumu 882,811 tulun, nokoingkawas kumaa 29,400 tulun piagalon 853,411 ontok toun pogului dilo.
Montiri Padsakaian Datuk Seri Liow Tiong Lai kotumboyo do kinongkawasan diti kotilombus doti lobi-lobi kagu soira opongo projik kapanaruan ralan Tutubpoon Kapal Tumulud Sandakan dilo.
Kapanaruan ralan Tutubpoon Kapal Tumulud Sandakan popomilo doti do kopotindalan kapal miampai aiso kapatantuan muatan montok papanau karaja kapal Airbus om Boeing 737, ka dau id abaabayan pinonimpuunan popoinggayo ralan Tutubpoon Kapal Tumulud Sandakan ih pinotimpuun di Luguan Montiri Datuk Seri Najib Tun Razak hiti koniab.
Mantad dilo, ka dau, soira opongo tiinu, alansan kopio porinta do asil tosikap doid bogian ‘ekoponombuluian’ Sabah kaanu papalantoi doulu noh id watas diti.
Minoboros isio do laang dilo kaanu doti mamagayat lobi ogumu komponi ponuludan suang pogun om ponuludan sewa poimbida doulu noh mantad China montok tumulud kosondikot id Sandakan.
Namot dilo, minoboros ih Liow do koporintaan Pisompuruan popoobi do RM41 riong montok kotundaan idsuang pomorunan sawat id Sabah ontok toun diti.
Tumanud dau ginumu dilo mantad poruntukan RM79.2 riong pinosodia do koporintaan pisompuruan montok pomorunan padsakaian id pogun diti ontok toun diti maya do Abaabayan Malaysia Ko-11 (RMK-11).
“Minggisom kopio om tumopot o koporintaan pisompuruan montok poposodia do kounalan infrastruktur tosonng kopio montok papatantu do kosonongon koposion rayat id Sabah kaanu popoingkawas,” ka dau.
Minoboros isio do ontok toun nakatalib, kiginumu RM13.1 riong nakabalanja noh montok kotundaan ‘infrastruktur’ kikoompitan padsakaian id Sabah ih kopoompit do mogisusuai pomorunan.
Ka dau montok pomorunan sawat noopo, kiginumu RM1.4 riong noh nakabalanja. -Bernama SANDAKAN: Luguan Montiri Datuk Seri Najib Tun Razak minoboros do parti pambangkang id pogun diti aiso ahal (agenda) tosonong om au obuli silihon pokilansanan do rayat montok moningolig/ mamajamin timpu tabantalan pogun di lobi koburu om otoonong.
Najib sambalik dilo monondos do parti om momuruan ngawi pambangkang sabaagi koilo noopo ‘manangod’ om monongkiwal om mangamu-amu porinta sundung pia pisingkiwalan diolo asaru au kosuang pomusarahan, au olidas pomusarahan om au otulid (rasional).
“Yoho sabaagi suntu. Soira gatang tumau petrol koinsawat (sabap do gatang tumau id dagang sompomogunan nokoinsawat), ka diolo Luguan Montiri (PM) ih pinopoinsawat. Isai pasalaan disio (pambangkang)? PM.
Soira gatang tumau koinsiriba, (ka pambangkang) gatang dagang haro (sabap gatang dagang sompomogunan nokoinsiriba). Ilo au aadil. Nung koinsawat gatang, paraaton oku, nung koinsiriba gatang apatut do kaanu oku pamarayahan,” ka disio.
Noboros di Najib ahal dilo ontok minanahak boboroson id abaabayan koponimpuunan ‘Ekspresi Negaraku’ id Padang Perbandaran Sandakan hiti koniab.
Nokotindapou nogi ih Boyoon Montiri Sabah Datuk Seri Musa Aman, Montiri Komunikasi om Multimedia Datuk Seri Dr Salleh Said Keruak, piipiro montiri kabinet pogun om pisompuruan om momuruan rayat.
Sabaagi suntu kagu, ka Najib, soira porinta mogowit papaapu China papaapu id pogun diti, tandasan do pambangkang o porinta papadagang kokuasaan takawas (kedaulatan) pogun nga soira porinta maganu koputusan mongidu do pibatosan kapaapuan dilo, pisingkiwalan do pambangkang. Id suang ahal dilo, ka Najib, rayat au obuli papataru do kalansanan kumaa parti om kopomuruanan parti pambangkang sabap padamaan diolo bulun noh montok kopontingan pulitik sompori-pori om okon montok timpu tabantalan rayat om pogun.
“Nonggo obuli (parti pambangkang) monuridong porinta di aandang. Parti Keadilan Rakyat momusorou suai. DAP momusorou suai. (Tun Dr Mahathir momusorou suai. (Datin Seri) Dr Wan Azizah momusorou suai. (Tan Sri) Muhyiddin momusorou suai (Datuk Seri) Shafie momusorou suai.
“Intongai kopoilaan ngawi diolo. Mogisusuai kopoilaan. Baino boros suai, suab boros usi. Ilo sabap moboros oku do iyolo diti (pambangkang) abaal ‘U’ turn’,” ka dau.
Tandasan nogi di Najib o pambangkang kuminam monipu rayat miampai mamajanji do kaaka do nung koponguasa iyolo (pambangkang), punsoon diolo o Sukai Barang om Kotorinaan (GST) suai ko mongimuhot do hinonggo noolu mantad RM41 bilion GST tusin nopuhu porinta tikid toun kalapas au tinorimo RM6 bilion ih pinatahak kumaa rayat maya Sakadai 1 Malaysia (BR1M).
“Kinonggo pinakaayan tusin ih noolu dilo” Mongoi doid tinimungan koumoligan tokou, mooi doid sikul tokou, kumaa mongingia ngawi tokou, hospital tokou, dokutur tokou mongungubat, talun alun, waig om suai-suai kagu toinsanan dino montok kolumaagan rayat,” ka Najib.
Mantad dilo noboros di Najib: Kada noh ponombirang, nung kamanang iyolo ka diolo (pambangkang) kaaka do punsoon GST. Isio (pambangkang) obuli moboros asanang, boros diti ‘murah tuan-tuan’. Onu ih kalabus mantad kabang tokou diti omurah. Katapi gayaton tokou RM41 bilion mantad bajet, mantad nonggo ‘monutub’ liwang dilo?.
“(Nung RM41 bilion mantad bajet), Mantad nonggo mogium RM41 bilion. Sansagan doti papataam pakaraja tulun ginumuan. Sansagan doti elaun pakaraja putulon. Iduon doti BR1M, au doti kaanu momonsoi projik pomulaminan rayat, pisosoromo talun alun au kaanu popouhan, antaban doti ‘Lebuhraya Pan Borneo’,” ka dau.
Idsuang ahal dilo, pinosorou di Najib o pambangkang mooi kada monombirang rayat miampai momonsoi pongimbarasan/ pisingkiwalan au kosuang pomusarahan sabap ontok koimpupuson dilo rayat om pogun ih oontok waya nga otopot nopo muhang o koporintaan BN popoburu do ogumu kagu montok monulung rayat.
Montok pogun om rayat Sabah, noboros di Najib do toririmo isio kiginawo (prihatin) miampai kopokionuon om tuntutan koporintaan pogun Sabah id siriba kopmuruanan Musa.
“Datuk Musa sabaagi Boyoon Montiri asaasaru papaatod suart kumaa dogo om nogi asaaru rumuba miampai dogo. Lobi orohian oku montok disio mantad au kaanu sabap laang disio otopot, au isio momonsoi kopoilaan poingukab. Rumuba isio dogo sabap tokou diti iso paganakan, paganakan BN,” ka dau.