Monginsada pinosoou au momoguno bom sada mamagakom asil daat
SEMPORNA: Monginsada hoohobi kozo suku tinau Bajau Daat id Zon Oumohig Kohisaon Sabah pinosoou tu au momoguno do haang momboom sada montok kapaganu asil kapamagakaman daat miampai asaanang.
Kumoduvo Huguan Staf Boogizan Ponoizukan Poimbida om Teknikol Boogizan Koumohigan Poimbida Papak Kohisaon Sabah (ESSCom), ACP Victor Sanjos minoboos do kopoingatan dino sumusuut pinongitoban pinolikud do boogizan popogiotkuasa hoohobi kozo Tinimungan Pulis Marin (PPM) pinopokito do ogumu monginsada nagakom minomoguno haang dino id ESSzone.
“Mamagakom sada momoguno bom sada obuli momusno do ‘ekosistem’ om koikonon vatu kalang daat, suvai ko koinsomokan dino obuli kapagahap kosinduahan doid tinan sondii om tuhun posoihi,” ka disido.
Noboos disido ahahl dino ontok sinoomo id koponutuban abaabazan kopulisan mogiigizon pinanjul songovian PPM Semporna Wilayah 4 Sabah miampai pinisokodungan Koisaan Kotundunan Bajau Daat (Pekebal) doiti.
Abaabazan ih pinotimpuun di Pemangku Komander Pasukan Polis Marin Wilayah 4 Sabah Mohd Nor Zaid Mohd Said dino notindapou di kiikila 500 mogiigizon suku tinau Bajau ih papadadi do daat sabaagi mato pogiuman tagazo (rezeki) dosido.
Namot dino, minoboos zi Mohd Nor Zaid do saavi-avi boogizan kitonggungan dumadi mato om tohingo tinimungan koumohigan montok manaak kopoihaan koimaan talaat di antakan id Semporna.
“Pituubungan tavasi piahatan boogizan popogiotkuasa miampai mogiigizon id tisan daat kaanu popoingkavas vagu mantad timpu doid iso timpu om au monondos upisol pulis diti sabaagi puu koumohigan noopo katapi obuli popogiot piombahutan ontok timpu mikot,” ka disido.
Id ahal dino, ka disido abaabazan kopulisan mogiigizon nopo nga ‘platform’ tavasi kozo piahatan PPM om mogiigizon songkoizonon mikunsi pomusaavan, kobohingkangan om atag montok toihahaan boogizan savat.
“Om nogi abaabazan diti obuli adadi ‘medium’ papatantu do onu noopo lahan tonudon om kootulan ngavi ih minog do pogiotonkuasa maganu kokilaan kogunoon om ‘hak-hak’ toinsanan boogizan kaamung no monginsada ngavi,” ka disido.
Id abaabazan dino, Markas Operasi PPM Wilayah 4 Semporna minanaak nogi tohuod kumaa 20 tuhun okuang vinakas (OKU) om tuhun nongohoing id Semporna.