RM80 riong projik popoinggayo ralan tutubpoon kapal tumulud Sandakan

SANDAKAN: Pinoboros di Luguan Montiri Datuk Seri Najib Tun Razak o poruntukan kiginumu RM80 riong montok projik popoinggayo ralan Tutubpoon Kapal Tumulud Sandakan ih maan potimpuuno ontok pintangaan toun diti.

Minoboros isio do kapanaruan ralan dilo popomilo doti do kopotindalan kapal lobi agayo doulu noh ponuludan kotilombus mantad China, Korea, Jepun om mantad tampat suai.

Ka dau, kapatantuan montok papanaru do ralan dilo winonsoi id labus timpu Abaabayan Malaysia ko-11 (RMK-11) kalapas asil pinirubaan disio miampai mongindapu ponombuluian id watas diti ontok pinapaharo do abaabayan kopongintongan osonong kopio id Harbour Square Sandakan hiti, di ontok 3 Mac nakatalib.

“Nokopomonsoi noh lansanon mongindapu ponombuluian do kopokionuon diti montok popomilo do lobi ogumu ponuludan kotilombus doid watas diti.

“Ontok diri, tuminilombus oku ruminomut Montiri Padsakaian (Datuk Seri Liow Tiong Lai) om pinopolulus do kapamanaan projik diti,” ka dau ontok minanahak boboroson id pinoimaganan linominon terminal wagu om popoinggayo ralan Tutubpoon Kapal Tumulud Sandakan hiti, koniab.

Karaja popoinggayo dilo pialatan dino papanaru do ralan mantad 2,134 meter kumaa 2,500 meter.

Minoboros ih Najib do kuntiriktor ih papanau do projik popoinggayo terminal Tutubpoon Kapal Tumulud Sandakan pogului diti papanau do projik papanaru do ralan dilo.

Minoboros isio do kapamanaan projik dilo maan posikapo, tumimpuun pintangaan toun diti.

Kinomi di Luguan Montiri do projik popoinggayo ralan dilo kiguno kumaa karaja popoinggumu do bogian ponombuluian id watas diti om kalapas dino kaanu popoingkawas konuonuan (ekonomi) rayat.

Ka dau, korikotan lobi ogumu tutumombului nogi kopoingkawas doti do ginumu tombului id hotel posorili watas diti om watas songindoros om popoburu do pamagayatan ‘ekoponombuluian’.

Noboros di Najib do projik diti nogi katanud miampai ‘komitmen’ disio montok papatantu do Sabah koburu doid tigulu om koirad miampai pogun ngawi id Semenanjung.

Ka dau, Sabah haro kobulihan tagayo om onu ih pokigunoon pogun diti nopo nga kotundaan ‘infrastruktur’ montok kounalan rayat diolo.

Id ahal dilo, muhang isio rayat doulu noh id pogun diti tumilombus manahak sokodung kumaa porinta montok papatantu do kopongoputan laang montok popotounda om popoburu do pogun.

Sabap dilo, ka dau, rayat kada kaakan ponombirangan parti pambangkang ih muhang monombirang toiko paparaat om popoompuong rayat.

Ka dau, iti nopo nga duo sinjata pambangkang montok kapaganu sokodung rayat.