Sunduan ‘patriotik’ mositi poinsuang id ginawo rayat Malaysia: Najib
# Kada popiodu ngawi pialatan Koporintaan Pogun om Pisompuruan
SANDAKAN: Sunduan ‘patriotik’ toiko oupus kumaa pogun om kotoboi popoburu do nopo noopo montok gumaga do kokuasaan poingkakawas pogun diti mositi haro idsuang ginawo potitikid rayat Malaysia, ka di Datuk Seri Najib Tun Razak.
Minoboros ih Luguan Montiri, nung opurimanan oupus om kotoboi rumundun montok gumaga do pogun dilo poinggirot noh idsuang ginawo potitikid rayat Malaysia, aiso isaiisai kaanu mangasou do kokuasaan poingkakawas pogu diti.
“Koilo tokou do nung haro sunduan gumaga do pogun tokou om tantu noh do pogun tokou kotilombus koburu doid tigulu sabap aiso nonggononggo sangod pogun id labus pogun nangku toiko mantad suang ih katama momonsoi ahal montok momiraag do pogun diti toiko paparatu do porinta ih pinili rayat Malaysia,” ka dau.
Noboros di Najib ahal dilo ontok m minanahak boboroson pinopotimpuun do abaabayan ‘Ekspresi Negaraku’ id Padang Kakadaian Sandakan hiti koniab. Nokotindapou nogi ih Boyoon Montiri Sabah Datuk Seri Musa Aman, Montiri Komunikasi om Multimedia Datuk Seri Dr Salleh Said Keruak, piipiro montiri kabinet pogun om pisompuruan om momuruan mogigion.
Pinosorou disio rayat kokomoi do koligogon sokiro ko haro ‘sangod idsuang kobog’ id pialatan rayat Malaysia miaga ih nokoimamang puru koumoligan ontok kinantakan pinonugkuan tulun taraat Sulu di toun 2013.
Najib ih minongondom pinongolubukan Supt Ibrahim Lebar ih natadon mantad Semenanjung minoboros do puru koumoligan dino nokomoi nokorundun id kinantakan dilo sabap haro puru pulis sondiri minongowosu ‘rahsia’ papanau karaja kumaa sangod.
“Popoilo oku do montok Sabah noopo, ontok toun diti nakabalanja tokou kiginumu RM323 riong montok papanau karaja Zon Oumolig Kosilahon Sabah (ESSZone) diti. Gisom baino, ‘alhamdulillah’ (bogian ESSZone) oumolig. Pinoilo oku do ogumu noh tutumombului mongoi id Semporna.
“Pomorunan ponombuluian koburu id disan daat kosilahon diti. Sabap nokuro? sabap ponoluodan porinta mantad koporintaan pogun nangku toiko koporintaan pisompuruan,” ka dau.
Idsuang ahal dilo, pinosorou di Najib o toinsanan bogian tuh kada popiodu ngawi pialatan koporintaan pogun om koporintaan pisompuruan sabap koporintaan pogun om koporintaan pisompuruan miagal ko iso paganakan ih haro iman-imanon, gaab om tujuan ih iso’i ino nopo nga montok popotoonong om popolumaag do tana Sabah om popolumaag do rayat dau.
Mantad dilo, ka Najib, rayat Sabah au minog do oimbayatan miampai slogan “Sabah Montok Sabah” sabap sabaagi Luguan Montiri, momonsoi isio di tosonong kopio montok pogun dilo om rayat diolo.
Sabaagi suntu, ka dau, Sabah nopo nga pogun ponorimo poruntukan kotundaan koporintaan longkod poinggagayo montok duo toun Abaabayan Malaysia Ko-11 (RMK-11) miampai poruntukan RM9 bilion ilo nopo nga 10.3 paratus mantad bajet koinsasanai koporintaan longkod. “Momonsoi tokou nogi toiso-iso ih lobi mantad onu ih pomusarahan rayat. Sabaagi suntu Gontob 1 Talun Alun Tagayo Pan Borneo montok Sabah. Alaid noh tulun Sabah poingandad. Duo ngopod om limo toun magandad Talun Alun pan Borneo.
“Songulun nokoumbal nosiliu Luguan Montiri 22 toun katapi au minomonsoi Pan Borneo montok Sabah. Au oku poh nokorikot 22 toun. Au oku doti korikot 22 toun (osiliu PM). Katapi nokopomonsoi noh ‘Lebuhraya Pan Borneo’,” ka Najib.
Okon ilo noopo, ka Najib, katapi talun alun tagayo dino nokomoi au mongontok nuununu ‘tol’ sabap “pataakon ku wawa diti montok Sabah”, ih nakaanu tapapan togumu mantad nopodan noribu tulun nokorikot id abaabayan ‘Ekspresi Negaraku’ dilo.
Minoboros ih Najib do gontob koiso projik dilo, koporintaan longkod kopongobi do RM12.8 bilion montok pamansaian lobi 700 kilometer talun alun tagayo mantad Sindumin, Sipitang pakaayan id Tawau om soira opongo poimponu gontob ngawi ih suai, koponolon doti balanja o projik dilo lobi RM20 bilion.