Okon natadon do ahal ‘osotol toiko ‘ounsub’
# Koponguhanan sukai ponombuluian okon sabap aiso kousinan togirot - Sapawi
BEAUFORT: Olimon di Puru Parlimen Sipitang Datuk Sapawi Ahmad o panandasan tinan pointantu ih minoboros do porinta aiso tusin togirot sabap papanau do mogisusuai kararalanon sukai om ih kawawagu sukai ponombuluian.
Tumanud disio do koponguhanan sukai ponombuluian dilo okon sabap mantad ahal ‘osotol toiko ounsub’ nga ilo kigaab montong monginsonong do kounalan ponombuluian id pogun diti kaamung noh popoinggumu kaagu do kounalan di pokigunoon.
Ka disio kinoingkawasan Kalabusan Suang Pogun Omumuk (KDNK) ontok toun diti otopot kopio ponokotanda do Malaysia haro ‘ekonomi’ di aadang om koponurat doti kosunion sundung pia kotoguang do mogisusuai ponokialitan koinsasanai (global).
“Maya kopomuruanan Luguan Montiri Datuk Seri Najib Tun Razak, nakaanu Malaysia minamagayat papaapu songkosuaian doulu noh pogun monguasa tagayo miagal China, pogun Timur Tengah om ih kawawagu pogun India.
“Iti otopot kopio ponokotanda do Malaysia okon noopo haro kousinan (ekonomi) ogirot katapi nogi kopokito do pulitik aadang ih kaanu nogi mahahak kotumbayanan kumaa papaapu labus,” ka disio.
Noboros disio ahal dilo ontok romuto kalapas Abaabayan Mongukab Puasa songowian Rayat id Masjid Kampung Lawa, hiti di tadau Koonom nakatalib.
Nokotindapou nogi ih Panakadai Montiri Ponombuluian, Koubasanan om Kinoiyonon Posorili Datuk Kamarlin Ombi, Boyoon Komulakan Umno Sipitang Yamani Hafez Musa om Boyoon Puteri Umno Sipitang Suzie Hamat.
Pinokianu ih Sapawi minongomi kokomoi ahal koponguhanan sukai ponombuluian ih pongontok kumaa hotel om lamin pongidopan nokorijisto ih pogirotonkuasa tumimpuun 1 Julai tabantalan.
Sumusuut koponguhanan sukai dilo, mogisusuai laang ih koimbulai alasu om panandasan aiso kontodonon pimboroson di bogian pointantu gisom moboros do ‘ekonomi’ Malaysia timpu diti au osongkuro osonong.
Kopinamot abaabayan sungkai dilo, Sapawi ih nogi Potunud Yayasan Sabah nogi pinopotunui do toluod kumaa tinimungan ‘asnaf’ om toluod RM10,000 kumaa Koiyonon Rukun Tetangga (KRT) Lumadan montok papanau do abaabayan id bogian mogigion songkoiyonon.