RM1.1 riong monginsonong sunsuyon Matau Patau om Meliau: Ronald
BELURAN: Koporintaan pinopolulus do poruntukan kiginumu RM1.1 riong montok karaja mongumbasi sunsuyon Matau Patau om Meliau ih kiharo id wawayaan ralan Nangoh Meliau id Telupid.
Puru Parlimen Beluran Datuk Seri Dr Ronald Kiandee minoboros do poruntukan di pinatahak maya ‘Unit Penyelarasan Pelaksanaan’ (ICU) Koupisan Luguan Montiri dilo sabaagi laang panalasaian timpu toniiba montok momonsoi sunsuyon ponoborong arata osuriba kalapas goduoduo sunsuyon dino noindamaan naraag mantad podi piipiro toun nakatalib.
Isio ih nogi Kumoduo Yang Dipertua Dewan Rakyat minoboros do soira opongo tiinu, ino kapanahak doti kounalan piturubungan padsakaian kumaa lobi 1,800 mogigion mantad apat kampung kopoopit do Kampung Pinunakan, Rumidi, Rancangan Nangoh om Sinaputan.
Noboros disio ahal dilo kalapas minoi intong kinaraagon Sunsuyon Matau Patau id Nangoh, Telupid songowian Boyoon Potunud ICU Datuk Seri Ahmad Zaki Ansore Mohd Yusuf, Kumoduo dau Razali Wahab om Upisor Koburuon Pogun ICU Sabah Datuk Ruji Ubi, koniab.
Nokotindapou nogi ih Panakadai Montiri Kousinan Datuk Seri Panglima Michael Asang om Upisor Watas Telupid Benedict Asmat.
Id ahal dilo, noboros di Ronald do piagaaga do kiginumu RM78 riong pokigunoon montok popoinggayo talun alun NangohMeliau kisinodu 12.5 kilometer, kaamung momonsoi kawawagu piipiro sunsuyon ih kiharo id wawayaan dilo.
Momoguno nogi do pongumbasian tosikap nopo nga Ralan Tanjung Nipis, Paitan om ralan sumuang doid Kampung Pantai Boring ih poinsuang Lamin Koundangan Pogun (DUN) Sugut.
Sontonudon dilo kalapas diri minoi intong kobolingkangan ‘infrastruktur’ ralan kampung mantad Kampung Tanjung Nipis gisom doid Kampung Batangon Darat Paitan.
Minumbaya nogi iyolo id Masjid Kampung Kobambangan Paitan ih nopongo noh minomonsoi om minoi intong pangatagan tapak pamansaian Masjid wagu Watas Tokoodo Paitan ih nookunan noh poruntukan kiginumu RM1 riong mantad ICU JPM.
Nokotindapou nogi ih Puru DUN Sugut Datuk James Ratib.
Sontonudon ih suminakai helikopter nogi minongintong mantad sawat talun alun Kampung Pantai Boring.