Kusai napatai om duo nosindualan id koligaganan talun alun
KUDAT: Songulun kusai kinoiyonon minidu pogun om duo ih suai noindamaan nosindualan id koligaganan id jam 8.36 dongotuong id Kilometer 7 Ralan KudatKota Kinabalu, di tadau Kolimo nakatalib.
Boyoon Pulis Watas Superintendan Douglas Nyeging Taong minoboros do munggui ih minidu pogun nointutunan sabaagi Silval Gunting, 66, papapanau korita Mitsubishi Triton natadon mantad Kapung Kandawayon, doros hiti.
Ka disio munggui dino nokomoi nakakandai nosindualan notipu tikagagng gibang om tulang poo wanan om minidu pogun do naamot pinokiubatan id Lamin Pongusapan Kudat.
Namot dilo, duo kagu ih nosindualan nga papapanau Toyota Hilux, songulun kusai kinoiyonon kiumur 44 toun mantad Kampung Sikuati ih nakakandai nopuraan idsuang tinan om songulun kusai kiumur 53 toun, susumakai Mitsubishi Triton mantad Kampung Masangkon ih nakakandai notipu tulang longon wanan.
“Goduo-duo munggui sompori-pori pinokiubatan id Hospital Queen Elizabeth Kota Kinabalu om Hospital Kudat, om kooyuon diolo pinoruput do osonong,” ka dau.
Noboros di Douglas do kes soriukon tumanud Seksyen 41 (1) Akta Padsakaian Ralan 1987 hinonggo pinapanau korita miampai alawong gisom kinontodonon do kinoligaganan.
Pokionuon disio o tulun togumu ih nokokito do kinantakan dilo tuh rumikot montok monulung ponoriukan.
Pinosorou nogi disio o tulun togumu doulu noh momomoguno talun alun tuh toririmo papanau miampai miingat-ingat om popogulu do koumoligan tinan sondiri om momomoguno talun alun ih suai.