Poruntukan RM2.7 riong naanu noh pomonsoi talun alun nopiang om kiburutak id Mukim Rundum
TENOM: Poruntukan tosikap kiginumu RM2.7 riong mantad Koporintaan Pisompuruan om Pogun montok mongumbasi talun alun nopiang om kiburutak id Mukim Rundum naanu noh.
Minoboros ih Puru Lamin Koundangan Pogun (ADUN) Kemabong Datuk Rubin Balang (gambar) do poruntukan dilo naanu mantad Komontirian Pisompuruan maya Kumoduo Luguan Montiri kiginumu RM1.2 riong, Komontirian Koburuon Labus Kakadaian om Watas (KKLW) kiginumu RM340,000 om Koporintaan Pogun Sabah RM300,000.
“Poruntukan dilo nakatahak noh duo minggu nakatalib om pinatahak doid Upis Watas Tokoodo Kemabong,” ka dau.
Nosuhu noh disio ih manakadai upisor Watas Tokoodo Kemabong tuh koponguhanan projik dilo maan wonsoyo idsuang timpu tosikap.
Poruntukan ih kopokianu kopio dilo nokopongunsub disio mokianu doid Kuala Lumpur mooi kapanaak kasagaan poimbida om osikap montok monulung manalasai do kobolingkangan dilo.
Tumanud disio, sundung pia projik dilo nopo nga tonggungan Koupisan Talun Alun (JKR) nga au diolo pinoburu.
“Sansagan ku minoi doid Kuala Lumpur montok mokianu doid Koporintaan Pisompuruan mokianu sakadai miampai kalansanan olulus ino tosisikap,” ka dau.
Suai ko ilo, nokopomoguno nogi ih Rubin do poruntukan ADUN montok manalasai do kobolingkangan kosusuaan id bogian dilo, nga kobolingkangan dilo nopo nga poruntukan ADUN di pointantu.
Kawagu nga, watas Kemabong alaab kopio om nogi ogumu kagu aplikisin mositi pibobohogion miampai tososonong.
Isio ih nogi ponorikohon Tinan Pomorunan Gata Sabah (LIGS) om Boyoon Umno Tenom minoboros do kalapas diti, pokionuon disio o momuruan id bogian kampung miampai au minog mongintutun do tinimungan mooi popotingkod do panandasan au osonong katapi manahak ralan kumaa karaja montok monginsonong do kinaraagan di noindamaan naraag.
“Au oku okukuan miampai ‘komenkomen’ au osonong ih parayaton paabaron bogian sosial Facebook doulu noh Whatsapp. Aiso kobolingkangan momonsoi ‘komen’ katapi id suang timpu ih iso’i mositi nogi patahakon kumaa isai ih tototopot kopio ih kitonggungan om au papanau do karaja dilo.
“Kinodomutan diti sabap do ponorinaan (birokrasi) oindamaan ogirot, hinonggo potitikid aplikisin di pinosuul di sosongulun lansanon rayat montok kopongokunan poruntukan di au asanang dilo sabap toinsanan aplikisin ih kiharo id bogian kawas maan posuulo doid bogian watas om nung alambat momonsoi ‘komen’ om tantu do kobolingkangan rayat kaanu manalasai.
“Yahai ih ponogi lansanon rayat ih haro toilalaan idsuang ahal rayat mininggisom kopio minomonsoi ahal dilo katapi ilo noh kinotutukon dilo...’birokrasi’ om ‘prosedur’ kaantob dilo,” ka dau.