Mogigion angatan monokodung porinta BN
# Kg Togop Darat nokotorimo poruntukan RM300,000
MOGIGION Kampung Togop Darat, kiikira 45 Kilometer mantad Kakadaian Ranau, nokotorimo do poruntukan gisom RM300,000 montokkoponguhananmogisusuai projik kotundaan ‘infarstruktur’.
Poruntukan dilo naanu maya Puru Parlimen Ranau Datuk Dr Ewon Ebin om Puru Lamin Koundangan Pogun (ADUN) Kundasang Datuk Dr Joachim Gunsalam.
Ponorikohon Tinan Koburuon om Koumoligan Kampung (JKKK) Kg Togop Darat Tobpinai Sauni Sabin minoboros do anggaran kos projik kotundaan di pinatahak do porinta id kampung dilo nga nokorikot noh RM300,000.
“Mantad dilo, angatan ku o mogigion hiti tuh manahak sokodung poimponu kumaa porinta posodia haro ih nigitan do Barisan Nasional (BN),” ka dau ontok minanahak boboroson id abaabayan kinakapan di Ewon kopinamot pinagaramitan Tadau Kaamatan om pinonimpuunan Sulap Papanau Kaparagatan Rela (POR) kampung dilo di kawawagu.
Namot dilo, Ewon id pason dau minamarayou do mogigion Kg Togop Darat sabap nakaanu minanganjur do Tadau Kaamatan bogian kampung dino do tikid toun sabaagi impoon montok popogirot do pisompuruan om piupakatan di kotilombus kumaa do mogigion miampai au mongintutun agama, suku tinaru om pomusarahan pulitik.
Pinosunud nogi disio o poruntukan kiginumu RM12 riong montok pongobi pamansaian sunsuyon watu sumoborong Bawang Kopuakan montok mongolon do sunsuyon sumoribau lumosod’ di obuli wayaan ontok timpu magadau noopo.
Pinopolulus nogi isio do poruntukan kiginumu RM16,000 montok pomoli koumatan Dewan Mini Kg Togop Darat. Lobi 100 mogigion tuminindapou abaabayan dilo ih pinaramai miampai pialaan sinding ngawi karaoke.