Tondu nohoing nokito noduso pointazid id suang hinimput toodopon

SANDAKAN: Songuhun tondu nohoing no nokito noduso pointazid idsuang hinimput toodopon id daamin dau id Taman Tai Fai Yuen Batu 8, id sosodopon koniab.

Huguan Pulis Uvang Asisten Komisioner Mohd Azhar Hamin minoboos do munggui nointutunan sabaagi Fung Soon Leng, 82, nokito noduso pointazid di tanak kusai dau kiikila jam 4.25 sosodopon.

“Boogizan pulis nokotoimo kopoihaan minugad doid tampat kinantakan kahapas sinunudan di tanak munggui,” ka disido.

Minoboos isido do pinonoizukan tosikap id tampat kinantakan nokoiho do songuhun tuhun nohoing no (munggui) guminivis tinan id suang hinimput toodopon miampai minomoguno do tali.

“Tumanud tanak munggui, tali ih ginuno nopo nga tali tiizonon munggui tomoimo monguzat tinan sabap munggui nakakandai oluo tuhang ponguhaban om kivaa likud pongubatan mantad podi Mei 2013,” ka disido.

Minoboos Azhar do tadau touvi no munggui pinokiubatan nga ontok 6 Jun 2017 id Klinik Tabaa Hospital Duchess of Kent Sandakan.

“Tumanud tanak munggui, idsuang piipio tadau diti munggui asaasau moboos au kataan miampai toluo ih notoguvang dau om tikid tadau munggui id koozuvon tumogob ginavo,” ka disido.

Minoboos isido ponoizukan potihombus pulis nokoiho do aiso nunuunu koimaan talaat nantakan.

“Tinan munggui kahapas dino pinaatod doid Hinimput Tinan Hamin Pongusapan Duchess of Kent montok pokizazakan monoizuk,” ka disido.