Atag sukai ponombuluian intongan tototopot
# Owiton doti ahal dilo id suang miting Kabinet pogun
KOTA KINABALU: Masaon do Koporintaan Pogun mongintong miampai tosorisid o sukai ponombuluian ih maan papanao popogirotkuasa ontok 1 Julai tabantalan.
Panakadai Montiri Ponombuluian, Koubasanan om Kinoiyonon Posorili Datuk Pang Yuk Ming (gambar) minoboros do ahal pamahagian sukai om kowosian dilo kumaa rayat Sabah mositi intongan tototopot pogului ino do papanaon om maan pabantango id miting Kabinet.
“Miagal ih pinoboros di Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun, owiton do komontirin ponombuluian ahal diti doid Kabinet.
“Mogium yahai kotos om momonsoi ponimbangan di kangaam kopio pogului pabantangon ahal dilo id Kabinet ih pohoroon doti idsuang minggu diti toiko minggu tabantalan.
“Nga, ih kiguno miagal ih pinoboros di Masidi, soriukon tokou ahal diti miampai tototopot soira ongopuhu poh sukai ponombuluian diti, ino pibobohogion nogi nangku kumaa Sabah toiko patahakon poimponu montok papanau do abaabayan ponombuluian hiti,” ka dau.
Noboros dau ahal dilo id pitimbungakan abar kalapas abaabayan koponimpuunan Lokusop Sompomogunan Pomogompian Harimau Dahan Sunda 2017.
Id ahal dilo, noboros di Pang do komontirian dau momonsoi iso koputusan kalapas kabantang ahal dilo id Kabinet ontok timpu rumikot.
“Ontok timpu diti, koputusan wonsoyon tokou do tumanud tokou nangku laang miagal tambalut tokou id Sarawak toiko sambalik dilo,” ka dau.
Minoborosisiodokoponguhanansukaiponombuluian dilo okitonan kiharo kowosian om karaaton dilo sosondiri mantad kawo pomorunan ponombuluian pogun om nogi tulun ngawi songkoiyonon.
Montok pomorunan ponombuluian, ka dau, ogumu tutumombului mantad labus pogun rumikot id Sabah om iyolo mositi mambarai sukai dilo.
“Om, ilo obuli monulung montok popoingkawas do konuonuan tokou di obuli gunoon montok monginsonong pomorunan ponombuluian Sabah om ogumu ahal kagu obuli wonsoyon tokou hiti.
“Momoguno tokou lobi ogumu ‘infrastruktur’ id Sabah, om momoguno tokou do lobi ogumu konuonuan montok papaharo do kotorinaan di lobi tosonong mooi lobi ogumu tutumombului rumikot id Sabah,” ka dau.
Poingkuro poh, noboros di Pang do rayat Sabah sondiri manaan kawagatan di lobi awagat om koponokialit sumusuut ‘ekonomi’ pogun di au atantu.
“Iti sabap okon toinsanan tulun ngawi id Sabah diti aiso kamampuan montok mamabarai sukai irad diti,” ka dau.
Pogului, Montiri Ponombuluian om Koubasanan Datuk Seri Mohamed Nazri Abdul Aziz minoboros do sukai ponombuluian dilo pongontok kumaa hotel om lamin pongidopan di nokorijisto.
Tumanud dau koponguhanan sukai dilo piaga-aga do kaanu momuhu kiginumu RM654.62 riong sokiro ko ginumu (kadar) pongidopan monginodop montok koinsasanai 11 riong linimput id suang pogun kosigampot 60 paratus.
Pinatarang dau do sukai ih kopongintong do ‘kadar’ mantad RM2.50 gisom RM20 pongontok kumaa tutumombului id suang om labus pogun montok pongidopan sonsodop maan potilombuso tumimpuun ontok 1 Julai tabantalan.