Bakisa minonoluod 216 kantung kuih raya kumaa puru koumoligan
KOTA KINABALU: Tinan Pomirukutan Om Kotundunan Sawo nagwi Lansanon Rayat Sabah (Bakisa) mamahagi do 216 kantung kuih ngawi toluod rayat kumaa siam tinimungan koumoligan ih pakaraja ontok Aidilfitri.
Yang Dipertua Bakisa Datin Seri Faridah Tussin ih nogi sawo di Boyoon Montiri Sabah Datuk Seri Musa Aman minoboros do toluod dilo nopo nga ponokotanda do pamagatangan kumaa karaja om pinongolubukan puru koumoligan doulu noh ih pakaraja id Sabah montok mintamong koumoligan pogun.
“Miampai kapanahakan kuih raya diti kapanahak doti do kolumaagan om papawakas sunduan montok kooyuon pangaramitan Aidilfitri kumaa puru koumoligan ih pakaraja id bogian papanau kaparagatan (operasi) om piwolitan pogun miampai au poingamung miampai paganakan koupusan,” ka dau.
Noboros disio ahal dilo kumaa monunurat abar kalapas minomolopot kantung toluod raya ih pialatan suai kisuang tiinumon, serunding, kurma om ketupat suai ko kuih raya id Lamin bakisa hiti koniab.
Minoboros ih faridah do tinimungan ponorimo nopo nga Polis Diraja Malaysia, Susumangod Daat Diraja Malaysia, Susumangod Sawat Diraja Malaysia, Tinimungan Karaja Songowian 2, Tinimungan Pakaraja 450, Agensi Popogirotkuasa Maritim Malaysia, Bogian Koumoligan Poimbida Bogian Daat Kosilaon Sabah (Esscom), Koupisan Bomba om manampasi Sabah om Koupisan Jijiilan.
Minoboros isio do ginumu ponorimo toun diti nopo nga iso’i miampai ponorimo di toun nakatalib om abaabayan kapanahakan toluod dilo potimpuunon di Musa suab (baino).