Pinangaramitan Kaamatan om Tadau Paganakan Bogian Tagas norikot rinamai
Tagas ih kiharo id Blok 5, Kampung Mosolog Kota Marudu nakapaganu kosiwatan montok minamaramai do Tadau Kaamatan miampai osuhatanan noopo, di kawawagu. Abaabayan ih tuminimpuun id ponong kosuabon om nopupusan id dongosodp nakapanau miampai koyuon koubasanan om norikot rinamai. Abaabayan kapanandakan Tadau Kaamatan dilo sinuangan miampai mogisusuai kaparagatan ih kagayat kopio hinonggo mogisusuai abaabayan ih kopoompit do tangaanak om tulun nongosukod minamaramai kagu pinangaramitan Kaamatan om Tadau Paganakan Bogian Tagas.
Abaabayan suai nopo nga abaabayan sipoot rayat ih nampayat di tangaanak ngawi ih kopoompit do abaabayan koubasanan miagal pialaan Sugandoi om siopon.
Abaabayan sangadau dilo nogi pinopogirot do piombalutan om piobpinaian di togirot okon noopo montok mogigion Bogian Tagas katapi nogi kopoompit do mogigion mantad watas suai miagal Ranau, Papar, Keningau, Sook om Kota Marudu sondiri.
Abaabayan dilo nopupusan miampai abaabayan sumayau do sayau koubasanan suku tinaru Kimaragang ilo nopo nga Sayau Pinakang miampai au miningkoyod solinaid soosomok sojaam.
Toinsanan ih nokotin-dapou id ramai dilo monongkotoluod kopio sabap nakaanu minogiwowoyo ngawi miampai puru paganakan ih nokorikot mantad somok om sodu.
Gaab tagayo montok popotimung do puru paganakan kopinamot Tadau Kaamatan nakaanu minomodimpot miampai nakalantoi.
Kalixtus ih nogi ponorikohon panganjur nasantaban ginawo kopio miampai abaabayan di pinaharo timpu diti.
Mangatag nogi isio tuh abaabayan irad dilo kaanu popotilombus ontok toun-toun rumikot.