‘Ops PTI Bersepadu’ minanaan 20 tulun Filipina
KOTA KINABALU: Kiginumu 20 modidikot aiso kasagaan (PTI) tulun Filipina tinaan kaamung duo tulun sabap kasalaan dadah id ‘Ops Bersepadu PTI’ Kota Kinabalu.
Boyoon Pulis Watas Kota Kinabalu Asisten Komisioner M.Chandra minoboros do papanau karaja dilo kopoompit do onom tiyonon id posorili bogian Inanam, Kolombong om Manggatal.
Ilo kaamung noh bogian ‘setinggan’ Taman Fantasi, lamin kongsi poingoros Country Height, lamin sewa Kolombong, Yayasan Sabah, setinggan Batu 7 Inanam om Kayu Madang.
Ka dau, operasi dilo pinapanau kiikira 10 jam tuminimpuun jam 11 dongotuong tadau Koonom gisom jam 9.30 kosuabon di tadau Minggu nakatalib.
“Duo PTI ih nagakom sabap kasalaan dadah noilaan ‘positif’ kalapas pinoniisan waig sobu.
“Soriukon iyolo tumanud Seksyen 15 (1) Akta Dadah Koligogon (ADB) 1952,” ka dau hiti koniab.
Minoboros isio do 18 tulun ih nagakom kopoompit do 15 tulun nosukod kaamung turu kusai om walu tondu suai ko tolu tangaanak.
Minoboros ih Chandra do kiginumu 58 tulun pinorisa id ‘Ops PTI Bersepadu’ dilo, iyolo nopo nga 44 tulun Indonesia om 14 kagu tulun Filipina.
Koinsanai ih tinaan ka dau, kiumur id bindurugan onom wulan gisom 50 toun om nowit id Longkod Upis Pulis Watas (IPD) Kota Kinabalu.
“Pongintongan tiyonon papanau kaparagatan timpu diti nga montok kopomunsaan koimaan taraat id bogian ih tiiyonon sabaagi rumun tulun taraat om kapatayadan dadah.
“Operasi dilo nogi kopoompit do pinanandaan lamin ngawi mantad Dewan bandaraya Kota Kinabalu (DBKK).
“Suai ko ilo, minaganu nogi o Sabah Electricity Sdn Bhd (SESB) do laang minomutul kopongoputan tolosok kapanaakan lotirik id pinongiyanan aiso kasagaan (setinggan),” ka dau.