Papanaon tosisikap Akta Koumoligan Siber
KOTA KINABALU: Akta Koumoligan Siber mositi posikapon papanau mooi do laang undang-undang obuli onuon kumaa tinan ngawi pointantu di aiso tonggungan om haro gaab taraat.
Ponorikohon Biro Komunikasi om Multimedia Upko Longkod Felix Joseph Saang minoboros do norikot nodi timpu montok porinta maganu laang tokodou kumaa kobolingkangan au olidas di obuli kopongundoronok koumoligan pogun.
“Pogului diti, asasaru tokou mogiboboros kokomoi do kiguno kopio porinta mongintong do nunu noopo kaparagatan id kaganaan ‘siber’ di obuli mogowit kobolingkangan kumaa tulun ngawi.
“Ungkiton tokou ahal kaparayatan paparaat, abar di au otopot, popoimbulai koulalahon otukanaan/araatan kumaa momuruan ngawi pogun, pimpukiauan, ponipuan om susui poh. Nga onu ih lobi kopotongob baino nga kaparayatan piunungan ‘ekstremisme’ maya media sosial,” ka disio.
Ka disio, porinta mositi mongintong om mangantob bogian ‘ekstremis’ mantad mongimbayat rayat Malaysia montok sumuang nonggo-nonggo tinimungan toiko piunungan ih kopongundoronok kotoonongan om koumoligan pogun.
Mantad tohuri noh diti, ka disio, asasaru tokou korongou minsasaru panangadan karaatan ih nantakan id piipiro pogun. Ningkokoton dilo kopotongob kopio om momoguno pongintongan di tototopot kopio mantad porinta.
Minoboros if Filex do id suang timpu ‘globalisasi’ pomogunan miampai aiso piwolitan baino, timpu toiko liwang okon nodi osiliu pangantob kumaa nonggo-nonggo tinan montok papabaabar nunu noopo piunungan toiko tutuduk diolo. Kosonongon ‘teknologi’ timpu baino diti nokopomilo do koinsanai ahal dilo nantakan.
Idsuang ahal dilo, norikot nodi timpu do porinta maganu laang tokodou om popointutun do Akta Koumoligan Siber montok mintamong om mamajamin koumoligan pogun.
Nga, otumbayaan isio do koilo kopio porinta do ahal dilo om tantu noh do maganu laang ngawi ih mositi do papanaon.
“Ounsikou oku miampai kopoilaan Kumoduo Luguan Montiri Datuk Seri Zahid Hamidi, di kawawagu, hinonggo noboros disio porinta papabanta Akta Koumoligan Siber ih manahak pongintongan sabaagi laang montok mangantob om monorina panangadan koimaan taraat ‘siber’ kaamung mongintong laang tinan pointantu poposuang do tulun taraat id pitimungan Dewan rakyat rimpu rumikot.
Felix ih nogi Upisor karaja-Karaja Poimbida kumaa Montiri sains, Teknologi om Inovasi minoboros do toinsanan tinan mositi monokodung laang porinta montok papatantu do kopomogunaan om ningkokoton koiyonon ‘siber’ toririmo atamangan,” ka disio.