Apat sampaganakan noduso, iso nosindualan
# Motosikal sinakaian di sampaganakan nakalanggar tohuri lori kargo poundorong id disan ralan
KENINGAU: Apat mantad limo sampaganakan kaamung tolu tangaanak noduso soira motosikal Honda EX5 ih sinakaian diolo nakalanggar iso lori kargo ih pinoundorong id disan ralan poingoros Simpang Ulu Daar, Ralan Tambunan-Keningau id sosodopon tadau Koiso nakatalib.
Songulun kagu tuminaap tondu ilo nopo nga sawo di papamanau noindamaan nosindualan id kinantakan jam 6.45 sosodopon dilo, ka di Boyoon Pulis Watas Deputi Superintendan Ahmad Jawila, hiti koniab.
Minoboros isio do munggui ih noduso nopo nga papamanau motosikal songulun kusai kinoiyonon kiumur 29 toun natadon mantad Kampung Kotonobon, Tambunan om tolu tuminaap ih noduso nogi kaampai tanak kusai dau kiumur onom om duo toun om tanak tondu kiumur apat toun. Koinsanai diolo natadon mantad Kampung Papar, Tambunan.
“Kaapat-apat munggui diti minidu pogun id tampat kinantakan om sawo di papamanau kiumur 29 toun mantad Kampung Papar, Tambunan noindamaan nosindualan om nakaatod noh doid Lamin Pongusapan Tambunan pogului pootodon doid Hospital Queen Elizabeth Kota Kinabalu,” ka dau.
Noboros di Ahmad do kiikira jam 7 sosodopon tadau Koiso nakatalib, nokotorimo o Balai Polis Tambunan do ruputan mantad tulun ginumuan kokomoi do kinoligaganan kopoompit do motosikal nakalanggar iso lori muatan kargo ih poundorong id disan ralan kikotumbayaan naraag.
Ka dau ponoriukan timpuuni id tampat kinantakan nokoilo do motosikal ih pinapanau di munggui maso mamanau mantad Keningau pakaayan id Kakadaian Tambunan.
“Motosikal dilo sinakaian di limo tulun sampaganakan om soira nokorikot id tampat kinantakan, papamanau dilo kikotumbayaan au nokosiwat minongilag om kalanggar bogian tohuri iso lori kargo ih naraag id disan ralan.
“Sabap kinalanggaran dilo, apat tulun noduso id tampat kinantakan, om sawo di papamanau noindamaan nosindualan,” ka dau.
Noboros dau do koinsanai munggui au minamakai topi keledar om papamanau nogi kikotumbayaan do pinapanau osiau tumanud do asil kinalanggaran di opud.
Ka dau asil pinonoriukan timpuuni nokoilo do kinoligaganan nantakan natadon mantad papamanau di au nakaanu minanamong motosikol ih pinapanau dau gisom nakalanggar tohuri lori ih narag dilo.
Tumanud dau, koyuon ralan alawos duo kawayaan om koyuon otuong, sawat talun alun nosimin, noyopos om alamou kalaaps nakarasam.
Noboros di Ahmad do soriukon do pulis o kes dilo tumanud Seksyen 41(1) Akta Padsakaian Ralan 1987.