Sabah tumilombus mamagatang pongulubukan puru tinimungan koumoligan
KOTA KINABALU: Tumilombus o koporintaan Sabah mamagatang do pinongulubukan puru tinimungan koumoligan montok manamong koumoligan pogun, doulu noh ontok timpu karamaian.
Minoboros ih Boyoon Montiri Datuk Seri Musa Aman do tinimungan koumoligan toririmo minggisom kumaraja, sundung pia ontok tadau rayat rumamai ounsikou, montok papatantu rayat kotilombus kaanu do kotoonongan om koumoligan.
“Koondom tokou (rayat) nogi kopongolubukan puru tinimungan koumoligan do naamot ongounsikou tokou mamaramai do Tadau Raya.
“Montok dilo, rayat monongkotoluod kopio miampai kapanahakan kuih ngawi ponokotanda otopot mantad rayat id Sabah,” ka dau id abaabayan kapanahakan kuih ngawi Aidilfitri kuminaa puru tinimungan koumoligan hiti koniab.
Pinosorou nogi di Musa o rayat mooi koponokodung pinongulubukan tinimungan koumoligan miampai monulung manahak do kopoilaan kikoompitan koumoligan montok laang bogian monguasa.
Kiginumu 495 kotak kisuang kuih-muih ih pinotoluod di 36 mononoluod kaamung 15 kotinanan okon porinta koonduan, pinabahagi kumaa siam tinimungan koumoligan ih pakaraja ontok Aidilfitri diti.
Namot dilo, ontok romuto monunurat abar, Komander Koumoligan Poimbida Kosilahon Sabah (Esscom) Datuk Wan Abdul Bari Wan Abdul Khalid pinopoilo do bogian dau do au alawong montok papanau ‘operasi’ koumoligan ontok timpu karamaian, doulu noh id kawaigan Sabah.
Tumanud dau, pinapaharo nogi o tinimungan koumoligan do pimpanaan songowian pogun Filipina kiginumu induo wulan diti sabaagi laang koumoligan sumusuut panangadan tinimungan ih haro koompitan miampai kapapanaan tinimungan taraat Daesh id Kakadaian Marawi, Mindanao mantad podi wulan nakatalib.
Ka dau poingkawason nogi do bogian dau do koinsoruan pimpanaan songowian Filipina om nogi Indonesia nung haro kogunoon montok popoburu haraja irad dilo.
Kumoduo Pesuruhjaya Polis Sabah Datuk Razarudin Husain minomisunud Pulis Diraja Malaysia (PDRM) au monorimo nunu noopo kopoilaan kokomoi ponginaman sumuang mantad rayat Filipina rumikot id Sabah sumusuut pinanangadan dilo.
“Nga, laang dagai (PDRM) nga montok tumilombus papatantu do kawaigan tokou au osuang kopio doulu noh ontok timpu karamaian,” ka disio. -bernama