Abaabayan ‘iftar, moreh’ popoinsomok tulun Silam

# Tulun ngawi Silam pokionuon momoguno abaabayan kopinamot Ramadan

kopio kopurokisan om kagarasan tulun ngawi Silam sokiro ko kopongubasanan puasa om moginakan id masjid ontok wulan puasa silihon sabaagi kaadatadaton. koubasanan.

‘Iftar’ toiko ointutunan nogi sabaagi mongukab puasa om ‘moreh’ nopo nga ointutunan sabaagi mongimpongo (makan/minum) kalapas pinapaharo do ‘solat terawih’ ontok wulan Ramadan, otopot kopio okitonan kopongukab liwang om kosiwatan montok popogirot om popolumaag do piombolutan om piobpinaian id pialatan tulun ngawi Silam.

Piombolutan om piobpinaian di togirot om olumaag dilo nogi kaanu popokito do kopurokisan om kagarasan tulun ngawi Silam om iti noh nogi ih pinatarang di Puru Parlimen Sipitang Datuk Sapawi Ahmad.

Minoboros isio do panganjuran ‘iftar’ id masjid toiko surau tototopot nopo nga montok popoinsomok do tulun ngawi Silam.

“Abaabayan dilo okon noopo montok mamaramai do Ramadan songowian ngawi momuruan toiko miampai rayat, katapi ilo nopo nga montok popogirot om popolumaag do piombolutan om piobpinaian ih posodia haro,” ka disio om minanamba do tujuan ih iso’i nogi montok abaabayan ‘moreh’.

Ka disio nung torimoon, abaabayan ‘iftar’ om ‘moreh’ otopot nopo nga popomilo do tulun ngawi Silam kaanu mogirurumoh id pialatan iso om suai om mongukab liwang montok mogiolon-olon tuwa pomusarahan om miapu toilalaan.

“Asil dilo okito kopio nung abaabayan ‘iftar’ om ‘moreh’ kaanu poposiliu do koubasanan montok tulun ngawi Silam tantu noh do okito kopio kopurokisan om kagarasan tulun ngawi Silam,” ka disio.

Tumanud disio abaabayan ‘iftar’ om ‘moreh’ pohoroon ontok tikid timpu Ramadan noopo om ilo obuli pohoroon ontok wulan ih suai.

“Nung Ramadan ointutunan sabaagi abaabayan ‘iftar’ om ‘moreh’, ontok wulan ih suai onuon tokou sabaagi moginakan songowian om ilo obuli nogi pohoroon kalapas Maghrib om Isyak,” ka disio.

Kokomoi abaabayan ‘iftar’ om ‘moreh’ id Parlimen Sipitang, pinosunud di Sapawi do alaid noh nakapanau abaabayan dilo.

Ka disio, tikid timpu Ramadan, abaabayan dilo maan papanao hinonggo nuludan kopomuruanan mindahu gana montok mogiwowoyo ngawi miampai rayat.

Nuludan kopomuruanan nogi kowoyo popoturuk do solat Maghrib om Isyak suai ko mongukab puasa om nogi moginakan.

Maya do abaabayan dilo nogi nuludan kopomuruanan nogi papatahak do toluod om ogi sakadai suai ko kaanu papatarang do kokomoi karaja ih poburuon do koporintaan Barisan Nasional (BN).

Tumanud disio laang dilo otopot nopo nga kaanu popogirot kagu piromutan momuruan miampai rayat.

Poingkuro poh nga, noboros di Sapawi do abaabayan minsomok rayat nakapanau noh mantad podi solinaid diti pogului Ramadan.

Nokotindapou nogi ih Panakadai Montiri Ponombuluian, Koubasanan om Kinoiyonon Posorili Datuk Kamarlin Ombi, Adun Sindumin Ahmad Bujang om Boyoon Komulakan Umo Sipitang Yamani Hafez Musa.

Sapawi papatahak do tusin zakat fakir mosikin kuma songulun mantad ponorimo id Pekan Weston, di kawawagu.

Sapawi intongan di Kamarlin om Hafez papatahak do tusin zakat Fakir Mosikin ih linansanan di KK Dikin Busman id Masjid Kg Lukut Beaufort. Gambar wanan, Sapawi om hafez ontok minoi id walai AJK Koonduan Sipitang Saumah Musah id Kg. Kebajang, Beaufort ih...

Sapawi intongan di Ahmad om Hafez papatahak do tusin zakat tinimungan ‘asnaf’ kumaa lansanon Imam id masjid dilo.

Monunurat Umno Sipitang Alidin Mohamad (poingkakat) osuau monokirumoh miampai puru Umno id ramai dilo.

Sapawi mogitatabi miampai ‘jemaah’ kalapas nasalasai solat id Masjid Kg Banting Sipitang.

Hafez intongan di Sapawi om Ahmad papatahak do toluod wagas ih linansanan di Imam id Masjid dilo.

KIGINAWO RAYAT...Sapawi miampai Hafez tuminombului Punggut Jair ih oinggorit sumakit id Kg Banting, Sipitang.

Ahmad intongan di Sapawi om Hafez papatahak do toluod kumaa songulun ih koponorimo id Masjid Kg Banting, Sipitang.