Porinta pinopoobi RM50,000 kumaa Masjid Datuk Haji Pengiran Galpam
SANDAKAN: Kiginumu RM 50,000 nokoobi do koporintaan pogun montok patahakon kumaa Masjid Datuk Haji Pengiran Galpam ih kiharo id Batu 7, hiti.
Minoboros ih Boyoon Montiri Datuk Seri Panglima Musa Haji Aman do poruntukan pinatahak montok momogonop nunu noopo kogunoon kikoompitan masjid kaamung koposodiaan kakamot ponogit ih napalai noh di komiti masjid.
Minoboros isio do kapamansaian masjid di tagayo om olumis dilo ginatang kopio sabap ogumu noh nokoponulung poporumpos do tulun ngawi Silam doulu noh ontok tikid tadau Kolimo.
Noboros disio ahal dilo id Abaabayan Kapanahakan Sakadai Ramadan id Masjid dilo. Nokotindapou nogi ih Panakadai Montiri Koporintaan Kinoiyonon om Pomulaminan Datuk Zakaria Haji Mohd Edris om Kumoduo Porosiden Konsol Kakadaian Sandakan Haji Mohd Hamsan Awang Supain.
Id abaabayan dilo kiginumu 1,300 tulun nokotorimo sakadai Ramadan om Zakat ih pinotunui di Musa.
Namot dilo, noboros di Musa do ontok papanau do ibadah puasa, tumilombus o bogian dau papanau karaja mindahu gana montok rumuba rayat om nogi papanau do kopomirukutan kontundunan kumaa tinimungan momoguno.
Alansan kopio isio tuh sakadai ih pinatahak dilo kaanu papagaan do kawagatan rayat doulu noh montok koposodiaan timpu Hari Raya Aidilfitri.
“Iti noh koubasanan Umno Libaran ih momoguno do wulan Ramadan miampai popogirot do ‘ukhuwah’ om piobpinainan oiyo ko tulun Silam okon noopo id bogian Libaran nga id pointongkop pogun,” ka disio.
Namot dilo, id abaabayan misusuai, kiginumu 1,385 tulun id Pulau Nunuyan nokotorimo sakadai Ramadan om Zakat ih pinotunui di Musa.
Minoboros isio do mogigion id pulou dilo au insan olingai katapi tonggungan montok monulung diolo tantu onuan pongintongan tototopot.
Noboros nogi disio do ahal kotundaan id pulou dilo nogi nonuan pongintongan kaamung laang montok monginsonong lamin ngawi di nangaraag noh, poposikap do kapanahakan waig tolidang kumaa id kampung dilo om monulung monginsada idsuang ahal kapamagakaman gipan.